Manera ta conoci, desde cu Minister Otmar Oduber a asumi e responsabilidad como e mandatario encarga cu desaroyo teritorial, infrastructura y medio ambiente, a pone hopi enfoke riba transparencia den e manehonan cu tin na diferente departamento. Un di e manehonan aki ta pa regula e casitanan crioyo, conoci como e ranchonan rond di Aruba na costanan y riba rif.
Director di DIP Haime Croes a informa recientemente cu gran cantidad di persona ya a pasa y busca formulario di registracion, pa cual actualmente tin 65 registracion na DIP di personanan cu a cumpli cu tur rekisito. Esaki ta un cantidad cu ta calcula cu lo aumenta, considerando e cantidad di ranchonan cu tin. Pesey DIP ta informa cu ainda tin oportunidad pa comunidad pasa DIP y registra nan rancho/casita crioyo te na januari.
Pakico e maneho aki?
- Pa control y vigilancia. E ta necesario pa regula locual ta pasando cu e casitanan aki, hopi biaha tin hopi sushi rond di nan, ilegalidad cu ta tuma luga den nan y actonan inmoral. Cu e proceso di registracion, esnan cu ta reconoce cu e casita ta di nan lo haya un permiso pa esaki y lo mester para responsabel p’e.
- Pa evita cu e cantidad ta sigui aumenta. Desde cu a anuncia e maneho, no ta permiti pa mas di e casitanan aki wordo construi. A traves di imagenan satelite lo controla anualmente e cantidad di casita cu tin y si tin cu a bin acerca. Casitanan cu bin acerca no lo wordo permiti y lo wordo remove. E casitanan existe tampoco ta wordo permiti pa amplia.
