E proceso di ROPV ta andando pa cual desde prome di October e concepto di ROPV (cROPV) tabata ‘ter inzage’ na diferente localidad y online, comunidad por a tuma nota di e plan na oficina di DIP durante un periodo di un luna (te cu prome di November 2019). Manera cu ya a informa comunidad, desde prome di November a inicia cu e proceso di zienswijze cu ta tumando luga te cu prome di December 2019. Comunidad ainda tin e oportunidad pa entrega comentario y pensamentonan por escrito a base di locual cu a mira of constata den e temporada di un luna di inzage riba e concepto di e ROPV.
Considerando cu e fecha aki ta riba un diadomingo, huridicamente comunidad por entrega zienswijze te cu dialuna 2 di december pa 12or di merdia! Ta importante pa comunidad tuma nota di e fecha y menciona pa no keda afo, pesey ta haci peticion na comunidad pa entrega esaki mas liher cu ta posibel.
Kico ROPV ta nifica pa Aruba?
Por medio di e Plan di Desaroyo Teritorial (ROP) 2019 – 2029, tin diferente area (gebied) defini riba e mapa di Aruba, tur cu un color cu ta indica ki tipo di area e ta, sea ta pa vivienda, naturalesa, desaroyo economico etc. Awor cu e ROPV, pa cada area lo duna na nan un ‘bestemming’, pues indicacion di kico por wordo haci den cada area y kico no, di tal forma cu Aruba completo ta di acuerdo cu ne.
A base di locual cu ya DIP a presenta di e ROPV den concepto, comunidad tin e oportunidad pa entrega nan punto di bista, remarca of obhecion te cu 2 di december 12or di merdia.
Inicio hoorzitting
Unabes cu e proceso di zienswijze pa ROPV termina ta inicia dibiaha cu e hoorzittingen cu lo tuma lugar riba e siguiente fechanan:
3 y 9 di december 2019 di 4or di atardi pa 6or di atardi na DIP.
5 y 6 di december di 9or pa 11or di mainta den sala di conferencia grandi di DOW.
Pues tur persona cu a entrega zienswijze lo ricibi e oportunidad pa reuni cu DIP durante di 20 minuut pa trata cualkier preocupacion y intercambia pensamento. Ta spera di conta cu presencia di tur persona cu a entrega zienswijze, pa di e forma aki forma parti na e proceso di democratisering di e ROPV.