Parlamentario Endy Croes ta lamenta di profundidad di su curason e manera di practica politica na Aruba. Si nos bay bek den historia Betico Croes e estadista, constructor, luchador y realisador di Status Aparte a usa un strategia pa unifica e pueblo pa logra cosnan grandi. Pues a percura pa bin cu entre otro Himno, Bandera pa asina trece nos pueblo hunto. Union ta haci forsa y asina a pidi y a haya e sosten di henter e pueblo pa por a logra e causa y e anhelo di pueblo, esta Aruba su Status Aparte. Un lucha tenaz di hopi aña pero semper riba nivel y cu respet pa tur e partnernan.
Materialismo a vence Idealismo
Nos por corda 22 di november 1985 – net un luna promer cu Betico por a mira su lucha wordo cristalisa esta 1 di januari 1986 momento cu Aruba a haya su Status Aparte – MEP a bay atras den voto kedando e partido mas grandi pero AVP cu 4 partido chikito a forma gobierno lagando MEP afor. Betico mester a duna conseho di acuerdo cu rapportnan di IMF pa tuma decisionnan grandi como cu LAGO a cera su portanan net e momentonan mas crucial cu Aruba ta drentando su Status Aparte y pueblo no a compronde esaki y e resultado di eleccion a alumbra e escogencia di pueblo. Sigur esaki a significa un dolor masha grandi pa Betico Croes personalmente. Na Cumana 84 despues di e eleccion aki Betico Croes a expresa e palabranan historico “Materialismo a vence Idealismo”. AVP y Henny Eman e tempo aya a hiba un campaña di luho regalando frigidaire, stoof, wasmachin y a convence pueblo pa vota diferente. Aki AVP a introduci e maniobra di vota pa “cos” dañando e mentalidad di pueblo. Otro mensahe di Betico na yegada na aeropuerto na maart 1983 despues di a logra Status Aparte: “Laga locual nos a logra awe ta un clompi diamante. Dia cu locual nos a logra awe wordo amenasa esaki ta significa Guera”.
Mensahenan negativo di AVP
AVP a hiba un politica pa dividi e pueblo y na 2015 AVP a mina nos Status Aparte y nos autonomia cu yegada di CAFT. Locual MEP a construi den tanto aña AVP a derumba parti di dje hibando un maneho financiero descabeya aumentando e debe nacional di 43% pa 90%. Awe den apenas 2 aña di Gabinete Wever Croes cos a cuminsa mustra bon y den 2020 lo alcansa un Surplus despues di 11 aña. Mike Eman, AVP y prensa comprometi a keda transmiti mensahenan negativo henter siman preparando cu champaña pa celebra un aanwijzing dado caso Hulanda dicidi asina. Cu Fe y perseverancia, cu determinacion y trabounan duro Prome Ministro Evelyn Wever Croes den nomber di Aruba a logra convence Hulanda cu aanwijzing no ta necesario y cu Aruba ta riba e bon caminda.
Parlamentario Croes ta termina bisando, tristo pa mira fanaticonan di AVP, prensa comprometi y politiconan di AVP prepara pa fiesta un aanwijzing pa purba score politicamente. Unda Boso amor pa boso Patria Aruba a keda? Aruba mester sosten di tur hende pa hunto nos saca Aruba for di e abismo aki. Para banda di esnan determina pa haci e trabou. Pabien Aruba.