Parlamentario Endy Croes contento di por a ricibi Minister President diasabra ultimo na aeropuerto unda na su yegada a tene un conferencia di prensa mesora den e sala di VIP. PM Evelyn Wever Croes a repasa en breve su biahe pa Hulanda. Diamars ultimo a tuma e decision pa e mes bay Hulanda unda “Su So” a aborda KLM pa asina acudi na Rijks Ministerraad cual a tuma lugar diabierna 22 di november, porcierto mesun fecha cu e protocol a keda firma un aña promer, esta 22 november 2018.
Aruba no a haya aanwijzing
Hulanda apesar di tabata menasa constantemente desde augustus cu un aanwijzing y tabata tin esaki riba agenda 22 di november, finalmente no a duna Aruba un aanwijzing. Prome Minister Evelyn Wever Croes den apenas 3 dia cu el a permanece na Hulanda a reuni cu representantenan di Tweede Kamer, Eerste Kamer, Raad van State, Knops, Arubahuis y finalmente a atende e reunion di Rijksministerraad. Den e reunion aki alrededor 14 minister di Hulanda mas Gevolmachtigd Ministernan di Aruba, Corsou y Sint Maarten ta entre esnan cu ta participa.
Situacion financiero di Aruba
Minister Presidente na un manera elocuente a sa di duna un splicacion hopi amplio di e desaster y Mega Debe cu el a hereda na november 2017, cu deficitnan di riba 400 miyon desde 2012 bin ariba. Na 2018 bou su maneho a logra den e promer aña un presupuesto supletorio budget neutral. Pues no mester a presta extra placa final di aña. Tambe a splica cu pa 2019 lo alcansa e norma palabra den protocol cu Hulanda esta un deficit di -0.5% cual ta igual na -25 miyon. Najaarsnota recien a mustra cu esaki lo ta mucho mihor y lo alcansa un deficit di -4 miyon florin solamente. Na 2020 lo bay tin un Surplus di 29 miyon cual tambe ta cumpli cu e protocol. Despues di 11 aña Aruba lo conoce un Surplus den aña 2020 y aki nos lo mester cuminsa paga e debenan di Mike Eman y AVP. Minister Presidente a mustra Hulanda tambe riba e hecho cu Mike Eman a presta placa na un manera descabeya y sin escrupulo prestando 2200 miyon esta 2.2 biyon florin den apenas 8 aña. Interes cu Aruba ta pagando riba e prestamonan aki ta 232 miyon pa aña cual ta rond di 635 mil florin pa cada dia 365 dia pa aña. Alabes a splica Hulanda di tur e PPP proyectonan cu AVP a firma cual e aña aki nos ta cuminsa paga nan pa 20 aña largo rond di 80.9 miyon pa aña.
Gobierno no ta pro retironan masal
Tambe a mustra Hulanda cu tur honestidad con duro ta trahando pa cumpli cu palabracion alrespecto personeelskosten. Rutte su vision ta keda ainda pa ‘massa ontslagen’ di alrededor 500 empleado pero e gobierno aki no ta di acuerdo cu esey y lo haci otro ehercisionan pa logra mesun meta sin manda hende cas. Finalmente Rijks Ministerraad a compronde y a duna e beneficio positivo pa termina y aproba e presupuesto 2020 na januari proximo y basa riba esaki lo kita e menasa 100% for di mesa. Mas aun pa 2020 Aruba probablemente lo tin su propio Begrotingskamer un aña mas promer cu a anticipa. Parlamentario Croes ta orguyoso di Minister Presidente cu no a duda y a bula pa Hulanda y apenas den 4 dia ta bek na cas cu un resultado positivo.
No a scoge pa welga di hamber, no a scoge pa bati weya y yama activistanan bin grita “firma awor”, no a scoge pa bebe Ensure scondi scondi, no a scoge pa desordo pero a scoge pa diplomacia.
Pabien Aruba y Welcome back, Prome Minister Evelyn Wever Croes.