Mi por a tuma nota cu Mike Eman a bolbe lanta di su winterslaap for di su penthouse luhoso cu te dia di awe e no por bin dilanti pa hustifica ta con el a yega na e esaki corda pa mantene siendo e no tin salario. Den su declaracionnan por a ripara e desesperacion pa por yega na poder pero tambe con Mike Eman ta haci yamada na tur e gremionan y mas ainda ta crea mas duda den pueblo di accion di cierto gremionan entre nan esnan sindical.
BBO na frontera
Den su desesperacion Mike Eman ta denuncia cu lo bin cu mas medida entre nan aumento di BBO na frontera y cu lo saca mas dividendo di nos NV-nan pa probecho di amigonan y cu tambe cu nos turismo lo baha. Esaki lo nifica cu lo bay cobra e 6% actual di BBO na frontera y esaki lo nifica un cambio husto den cobramento di impuesto pasobra tur cu entre otro ta busca material y bende riba entre otro Vraag en Aanbod lo mester paga ora di importa esaki di biaha na frontera. Pues no ta bin nada acerca pero solamente ta percura pa concurencia husto na pais Aruba.
Saca mas placa di dividendo di NV’snan
Awel nos escogencia ta facil: den tempo duro e yiu mester yuda su mama. Pues e NV’snan tin di yuda gobierno yena e gapnan financiero pa por yega un presupuesto cu un surplus. Nos por a scoge pa aumenta e BBO of sugar tax pa cubri nos presupuesto, pero no ta husto cu pueblo tin di sigui paga pa e daño cu Mike Eman y AVP a haci e pais aki. Y sigur esaki ta mientras cu nos lo crea pilarnan economico duradero pa e pais aki cu lo yuda nos den stabilisa nos finansas y mientras e yiunan di Gobierno, esta nos NV’snan tin e obligacion di yuda.
Mike Eman a chica nos NV’snan
Nos tin di recorda Mike Eman cu su subrino y ruman a strica mas cu 8 miyon pa nan auto di careda di ATA y ey e no a keha. El a laga Richard Arends masacra nos NV’snan mas cu 3 miyon y sin conta Sjiem Fat riba 5 miyon florin y asina nos por sigui cu e famoso proyectonan berde entre nan regala placa facil na Richard Branson, Al Gore y asina por sigui menciona e dispidimento di placa mientras nos debenan a keda crece.
Bipolaire Tienermeisje
Lo mas gracioso ta e siguiente declaracion di Mike Eman: “Den nos tempo nos a enfrenta Rutte luchando alma y curpa pa no asota nos pueblo cu medida y awe nos mester lucha uni atrobe pa salba Aruba”. Hecho ta cu el a dicidi di retira y laga su pueblo mal desampara yena cu debe mientras e mes a keda drumi den su penthouse. Pero lo mas gracioso nos ta corda su gran lucha ora el a sinta bao palo ta gaña un welga di hamber mientras e tabata bebe Ensure. Den Reino el a laga nos cara na berguensa ora a yam’e Bipolaire Tienermeisje y despues cu el a ripara cu tono di gobernador a cambia e mes a core lanta tent y baha na careda y su lucha di welga di hamber a caba, a tuma e KB y despues Caft yega cu orguyo.
Si Mike Eman kier sigui papia e bin parlamento bin defende su ex maneho. Si e no haci esey e bay sigui drumi den su super Penthouse y laga esnan cu si tin pueblo na pecho traha na bienestar di pueblo.