Diamars mainta Parlamento di Aruba a aproba unanimamente e ley di ‘single use plastic’, cual ta prohibi uzo di cierto productonan dañino pa nos medio ambiente. Lider di Fraccion di POR, Marisol Lopez-Tromp ta aplaudi e decision aki cu ta beneficioso pa nos medio ambiente y nos fauna. E ley aki ta prohibi uzo di por ehempel cierto tipo di plastic y crema pa proteccion contra solo (zonnebrandcreme) cu tin oxybenzone den dje.
E parlamentario ta splica cu e producto aki (oxybenzone) a y ta daña y mata nos koraalrifnan y a indica tambe cu den futuro lo prohibi su benta.
Igualmente e ta bisa cu mester felicita hopi negoshi y comerciante cu a adapta nan mes prome cu e ley a pasa y a cuminsa importa productonan biodegradable y evita uzo di ‘single use plastic’.
Lopez-Tromp a felicita Minister Otmar Oduber y e team cu a traha riba e ley aki. E ta spera cu ora implementa e ley lo bin cu un bon campaña di concientisacion paq asina tur hende por ta na altura di kico e ta encera y kico tur mester tene na cuenta cune.
