Home » Parlamentario Edgard Vrolijk (MEP): “E persona cu ta deposita un keho falso por ser castiga cu maximo un aña di prison of un multa di e tres categoria”

Parlamentario Edgard Vrolijk (MEP): “E persona cu ta deposita un keho falso por ser castiga cu maximo un aña di prison of un multa di e tres categoria”

by Admin
0 comment 45 views

Ayera por a ripara cu desesperacion a yega su Toppunt pa partido AVP, unda cu e unico persona esta Melvin Tromp por a presta su mes pa purba atacha imagen di nos Promer Minister Evelyn Wever-Croes, kende a bin ta hiba un maneho sublime y cu awendia nos por ta orguyoso cu Aruba ta riba e bon caminda financiero. Alabes e gobierno actual a percura pa crea e clima di confiansa bou di inversionistanan di exterior, unda cu prueba di esaki ta e groundbreaking pa un hotel na San Nicolas. Pero tambe muy pronto lo anuncia un gran cantidad di inversionnan cu lo crea cuponan di trabao y tambe entrada pa e pueblo aki. Lamentablemente tur surplus tin di bay pa e debe cu Mike Eman hunto cu su marionetanan a crea cu hopi orguyo.

Cobarde ta sconde tras di fundacion
Por a tuma nota cu e fundacion aki cu tin di ser lanta ainda, esta Fundacion Anti-Enrekicimento Ilicito y Salvaguardia di Patrimonio Nacional, ta pone nos corda riba e modus operandi pa locual ta enrekicimento di tereno. Unda cu tereno ta ser otorga na un compania cu ainda tin di ser lanta, pues cu ta traspasa un tereno pa un compania cu lo ser lanta y pa despues bira bende esaki y unda cu Melvin Tromp sa di e operacionnan aki, pasobra su persona tambe a haya un tereno erfpacht y a haci maluso pa bende esaki y haya placa facil di patrimonio di pueblo.

Peticionnan pa investiga fechorianan di AVP
Un cos ta sigur, e nomber di e fundacion aki ta bisa bon cla cu mester cuminsa den cas prome. Nos lo kier pa e fundacion aki – banda di su prome acusacion sin base djis pa atacha imagen di un Promer Minister cu si ta trahando di berdad pa pueblo – pa e siguiente peticion pa investigacion pa enrekicimento ilicito y salvaguardia di patimonio ta Richard Arends cu tur su negoshinan conflictivo cu su compania Horizon hiba den tur nos NV’s nan.
Despues ta ex Minister Mike de Meza den su rol den RDA pa priviligia Richard Arends y amigonan y tambe pa locual ta hedging cu a costa pueblo 230 miyon florin.
Tambe e proyecto di gas cu a costa nos companía estatal 27 miyon florin. Banda di esaki tambe mester cuminsa na denuncia abogado Sjiem Fat pa a explota NV-nan so 5.1 miyon florin. E fundacion mester para man den man cu Ministerio Publico pa exigi nan sigui cu investigacion di tereno di Benny Sevinger cu a abusa di patrimonio di pueblo pa enrikecimento di amigonan cu a sponser nan. Mester pidi tambe pa investiga con Mike Eman te dia di awe por biba den un penthouse sin cu e tin salario, pues ta bon pa pueblo sa ta con e ta yega na su entrada pa por sobrevivi, mientras cu pueblo ta pasando duro pa su mal maneho financiero y economico. Pues si e fundacion aki enberdad kier sirbi su meta, e mester ta obhetivo y cuminsa den cas prome denunciando tur e fechorianan di partido AVP, pasobra e fundacion aki ta nada otro cu un otro hala mas di AVP.

Denuncia falso
Minister Presidente mester entrega di inmediato un keho contra Melvin Tromp cu a firma e aangifte aki, pasobra e ta directamente responsabel pa esaki, pasobra e fundacion cu e kier sconde su tras no ta existi ainda. Y nos Promer Minister no mester tolera nada di contrincantenan politico cu ta purba na atacha su imagen, y sigur esaki ta muestra di miedo pa un dama cu a sa di lidera e pais aki cu tur su retonan pa por duna nos futuro generacionnan un speransa, pasobra Mike Eman a laga nan den scuridad. Y Promer Minister tin tur prueba pa contradeci e denuncia falso aki di Melvin Tromp y conforme articulo 2: 142 di nos codigo penal, cu e persona cu ta deposita un keho falso por ser castiga cu maximo un aña di prison of geldboete van de derde categorie. Y mi ta spera cu husticia baha pisa riba tiponan di kehonan falso asina pa di una bes por todo por stop cu e weganan infantil di difama hende.

Presion riba OM
Ta tristo pa wak con partido AVP awo ta insinua cu OM ta un organo cu influencia politico y ta purba hustifica caso di Paul Croes y Benny Sevinger. Denuncia a ser haci pero presion no tabatin y a laga tur cos cana y laga OM haci su trabao. Sigur esaki di aplaudi pasobra di un manera of otro mester cuminsa na frena e abuso di poder, corupcion y maluso di patrimonio di pueblo. Y den e caso aki cu tin un denuncia cu nos sa di adelanta ta uno falso pero asina nos lo laga OM haci su trabao obhetivamente y sin pone presion manera ta expresion di Marlon Sneek cu a bisa di lo keda bin presiona Ministerio Publico pa actua. Siguramente esaki ta duna muestra di cu pueblo mester tene cuidao pasobra e tendencia dictatorial aki ta uno hopi peligroso pa funcionamento di nos estado di derecho na Aruba.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio