SAN NICOLAS (AAN) – Diabierna atardi Minister di Salubridad Publico Sr. Dangui Oduber a acudi na Banco Social di Aseguradonan (SVB) San Nicolas pa e lansamento di e webportal MiSVB2.0. E mandatario a duna un discurso caminda e la enfoca riba e vision pa brinda un servicio moderno na e aseguradonan por medio di tecnologia. “Mi a nota cu SVB ta un organisacion hopi dinamico cu ta purba continuamente di trece solucion y cambionan den cada departamento. Mi ta orguyoso di con e vision di 2020 pa SVB ta bayendo y cu tur cos ta canando segun plan” tabata palabranan di e mandatario.
Tecnologia rond mundo ta avansa hopi lihe y pesey mes SVB mester keda proactivo pa asina uza cambionan na benificio di SVB. Cu e cambionan aki SVB lo funciona na un manera mas eficiente y cu transparencia pa e sociedad. SVB tin e deber pa administra e fondonan adecuadamente y cu confiabilidad, pa mantene e fondonan financieramente sostenibel.
E webportal, MiSVB 2.0, ta e prome paso solido pa SVB den e proceso di digitalisacion di nan servicionan. Mediante e plataforma digital aki, SVB ta comunica mas rapido y ta brinda su clientenan acceso na tur informacion cu SVB ta maneha den cuadro di e relacion SVB-cliente. Den SVB su vision 2020, SVB a propone su mes pa transforma di un organisacion tradicional, burocratico y cera pa uno moderno, accesibel y transparente. E medio pa logra e transformacion aki ta digitalisacion asina e mandatario a duna di conoce.
Innovacion por medio di digitalisacion ta forma parti importante di maneho di minister Dangui Oduber. E ta un forma pa traha mas eficiente y elimina burocracia y mehora servicio.
Minister Dangui Oduber a expresa cu su persona ta contento di mira con e director Sr. Edwin Jacobs hunto cu su staf y personal ta treciendo hopi cambio cu ta transformando SVB den un organisacion innovativo pa asina por brinda e miho servicio na nos comunidad Arubano. Finalmente Minister Dangui Oduber a felicita tur e trahadornan mustrando asina e aprecio cu e tin pa e bon trabou cu nan ta eherce.