Saga di personanan cu a perde riba lama, ta di semper, tin cu a bolbe pa conta y otro cu hamas a regresa y nunca por a conta di nan.
Historia largo tin di piscadonan Arubiano cu a subi lama y cu nunca mas a bolbe cerca nan famia.
Piscadonan cu a perde riba lama y nunca mas a bolbe, ta un topico cu nos generacionnan anterior semper a papia di dje, ta trata di e hombernan balente cu ta sali riscando nan bida, subi lama bay pisca pa mantene nan famia. Den tur famia y den tur bario tin un of mas storia of saga cu por wordo conta di un of mas piscado cu a perde riba lama.
Antes no tabata existi tur e aparatonan moderno cu awendia ta disponibel pa e piscadonan, no tabata tin cellular waterproof, no por a comunica asina lihe cu niun persona na momento cu malasuerte topa e piscado riba lama, pesey por bisa cu e piscado di antes sigur tabata pone su bida na peliger pa mantene su famia, pero asina mes algun cu a perde tabata tin hopi suerte di a wordo haya of rescata pa barconan riba lama grandi. Compara cu antes, awendia e chens ta mas grandi di por wordo rescata si bati alarma na tempo.
Esaki ta e saga riba lama di tres piscado di Savaneta, cu na 1953 a sali bay pisca y cu e motor di boto a daña, mal tempo y lama bruto, cu sigur no tabata den nan ventaha y cu na cierto momento nan a pensa cu nunca mas nan lo bolbe bek pa conta nan experiencia di perdi riba lama.
Tres piscado a subi lama
Tur cos a cuminsa riba Dialuna, 21 di September 1953, na momento cu e tres piscadonan aki cu hopi experiencia a prepara pa subi lama pa bay pisca, tabata trata di Francisco Schwengle di e tempo ey 24 aña, Dominico Schwengle di 42 aña y Pablo Geerman di 31 aña.
E dia ey e tempo tabata mustra bon pa subi lama y nan a dicidi di baha nan boto di 14 pia, pa bay pisca, sin cu nan tabata sa kiko tabata speranan un 7 miya for di costa di Aruba. Nan a mara e motor cu un cabuya na e boto y a subi lama cu e speransa di drenta bek cu hopi pisca.
En busca di pisca
Nan a tuma canto di e costa di Aruba bay ariba, pariba di Sero Colorado nan a bay purba nan suerte, pero tur cos tabata mustra cu no tabata tin hopi pisca den e area aki y nan a tuma e desicion di bay un 6 pa 7 miya pazuid di e tempo ey, Esso Club (Nanki) actualmente Rum Reef.
Aki ta unda mala suerte a topa nan, tabata den careda di 11’or di mainta cu e tempo a cuminsa bira malo, lama a bira hopi bruto y tabata suta e boto chikito cu e tres piscadonan den dje.
Ola grandi a bolter e boto y a benta tur tres den lama bruto
Mesora nan a dicidi cu di berdad nan no por keda mas riba lama y kier a cuminsa bay direcion di tera bek. Pero pa nan malasuerte e motor di e boto a dal paga, mesora nan a trata na start e motor bek, pero lamentabelmente e no kier a cende mas. E boto a keda drief mientras e olanan halto tabata suta e boto cu e tres piscadonan den dje, nan a purba keda mas hopi riba e olanan halto, pero e olanan tabata keda sutanan, te despues di dos ola hopi grandi, cu nan a scapa di nan, a bin e di tres ola cu tabata gigantesco a dal hopi fuerte te bolter e boto, bentando tur tres piscadonan den e lama blauw scur y hopi bruto.
Na momento cu e boto a bolter e anker di e boto a bay abou, esaki a wanta boto poco pa e no drief bay mas leu. Pero e otro problema tabata e motor cu nan a mara na e boto, esaki tabata stroba e boto di drief y parcialmente e boto a bay bou awa. E lama tabata asina bruto cu e movecion di e olanan grandi tabata manda e anker cada biaha mas den hundo y e peso di e motor y e anker tabata sink e boto poco poco. Cada biaha cu e olanan grandi dal e boto e tres piscadonan tabata wordo ranca for di e boto y benta den lama y cada biaha e tabata manera un lucha pa yega bek na e boto pa nan por a wanta na dje.
Tuma desicion dificil pa landa bay tera
Na dado momento nan a bin realiza cu nan no por keda asina mas y cu un di nan mester cuminsa landa pa bay tera pa busca ayudo, paso si nan keda caminda cu nan ta, e chens ta grandi cu nan no lo wordo localisa na tempo. Maske cu nan ta hombernan di experiencia riba lama, nan tabata teme pa pasa un anochi friu den lama teni na un boto cu poco poco tabata sink.
Francisco cu tabata e mas jong y e miho landado di nan, a tuma e e desicion pa landa bay tera. Fransisco a dicidi di kita un planki for di e boto cu tabata wordo usa como asiento, ela usa e planki aki como suport y a cuminsa landa bay direccion di tera pa busca ayudo. Pablo cu Dominico a keda atras colga na e boto gebolter wardando pa wordo rescata.
Francisco a wordo localisa pa un otro boto di piscado
Pa mas o menos un miya pazuid di e refineria L.A.G.O. un boto di piscado, a bin topa cu Francisco. Ariba e boto tabata tin dos piscado, ambos tabata trahador di L.A.G.O. E dos piscadonan aki cu tabata tin radio riba nan boto, a reporta cu nan a scucha un hende homber gritando pa auxilio, pero na prome instante nan no tabata mire. Ora nan a bira e boto mesora nan a topa cu Francisco cu tabata hopi cansa y sigur si no a topa cu e boto aki, lo por tabata fatal pa su persona.
E boto di e piscadonan di fam Murphy y Hassel tambe tabata di 14 pia y tabata mucho chikito pa bay na e sitio unda Dominico y Pablo tabata colga na e boto. Nan a dicidi di drenta e waf na L.A.G.O. y a bati alarma.
A sali pa busca Pablo y Dominico
Pa mas o menos 3’or y 50 di atardi, Marine Department, Loods y Aruba Flying Club a cuminsa cu un buskeda rigoroso den aire y riba lama.
Aruba Flying Club
E prome biaha cu nan a sali busca den e area unda Dominico y Pablo tabata perdi,e avioneta y ni e botonan den e area aki no por a topa cu nan, pero no a stop e buskeda, e tempo ey e boto di Loods y e Remolcador di Noord a bolbe haci un intento y e biaha aki Si nan a bin topa cu e boto gebolter y cu Pablo y Dominico wanta na dje. Nan a logra miranan net na momento cu nan tabata riba un ola halto prome cu ela baha bek.
Pablo y Dominico a wordo rescata
Asina ambos por a wordo rescata y hiba tera bek, caminda nan a reuni cu Fransisco y nan sernan keri. Un aventura cu por tabata tin un final fatal pa tres Arubiano, pero door di no a perde cabes, door di no a entrega, door di a tuma cierto desicionnan y a keda lucha. Lama a duna e tres piscadonan aki un chens pa sigui biba.
Nos di Arubanative.com no conoce e tres piscadonan aki y nos no sa si nan ta na bida ainda, pero sigur despues di a lesa nan storia, nos por yamanan hombernan balente, cu corahe y cu a haci tur cos pa sobrevivi. Francisco Schwengle e tempo ey un hoben, cu un condicion fisico asina bon, cu e por a landa algun miya su so den un lama bruto y cu maltempo riba dje, te ora ela yega un casi 1 miya for di costa di Aruba, unda ela wordo rescata pa un otro boto di piscado, esaki algo cu sigur merece un merito, un respet, e tabata tin su bida y di e otro dosnan den su man y su unico meta tabata yega tera y busca ayudo. E mas bunita di e saga aki tabata cu e tin un final felis y cu nan a biba pa por a cont’e.
FUENTE Y POTRET: Esso News