Oranjestad Aruba – Despues di a completa dos trayecto di e proyecto ‘Riba Caminda Pa Trabou’ exitosamente, JongerenLoket ta clausura e di tres trayecto cu mamanan soltera.
E Team Jongerenloket na Departamento di Asunto Social (DAS) bou di auspicio di Sociaal Crisisplan (SCP) ta consisti di Lider di Proyecto, Kayla Haakmeester y e asistente administrativo sra. Sheilah Odor. Social Crisis Plan (SCP) a pone como prioridad e proyecto ‘Riba Caminda Pa Trabou’ pa yega na e meta pa brinda e participantenan e oportunidad pa nan adkiri habilidadnan indispensabel pa no solamente trabou pero tambe pa nan desaroyo personal.
E proyecto ‘Riba Caminda Pa Trabou’ ta enfoca riba mamanan soltera cu ta ricibi asistencia social entre 18 te cu 30 aña cu tin un ‘gap’ pa subi mercado laboral. Meta principal di e proyecto ta pa hisa e participacion den mercado laboral di hobennan aki cu ta ricibi asistencia social. Jongerenloket ta ofrece diferente trayecto di siñamento, intermediacion y guia personalisa pa asina e hobennan por yega na un trabou satisfactorio, ta financieramente stabiel y stimula un participacion activo den comunidad.
Tur e hobennan cu a participa a inicia un trayecto di enseñansa yama; ‘Re-enforsa, Empodera y Asertividad’ facilita door di ‘begeleiding deskundige’ sra. Marianela Loefstok y sra. Madeline Ridderstap. E curso y tayernan a consisti di 14 les intensivo cu a enfoca riba aumenta conocemento propio, conscientisacion di auto-percepcion y habilidadnan social. Participantenan ta haya oportunidad pa comparti nan pensamentonan y para keto na comportacion cu nan mes ta haya importante pa cambia, defini nan metanan personal y describi plan di accion pa subi mercado laboral. Esaki ta contribui cu e participantenan den un forma colectivo y constructivo ta traha na (re)descubri nan propio potencialnan y por laga los di bareranan personal cu por ta un estorbo pa crecemento personal.
E proyecto “Caminda pa Trabou” ta apenas na su inicio y ya por tuma nota di e resultadonan positivo cu ta indica un total di 70 mama hoben a participa na e proyecto, cu un averahe di 70% di participacion entre e tres gruponan caminda un 17% a logra haya trabou.
Pa clausura e “leertraject” di e di tres grupo, JongerenLoket (DAS) a organisa un ceremonia special caminda e otorga un certificado oficial na cada un di e participantenan. Den presencia di su excelencia Minister President sra. Evelyn Wever-Croes, representantenan di Ministerio di Asunto Social y Labor, Ministerio di Ministerio di Turismo, Salubridad Publico y Deporte y lidernan di proyecto a honra cada un di e participantenan como individuonan independiente, cu hopi motivacion y ambicion pa nan futuro.
Jongerenloket y SCP kier a tuma e oportunidad aki pa gradici Biblioteca Nacional pa por haci uzo di nan localidad y tambe tur persona, instancia y departamento cu ta contribui pa e proyecto ta uno exitoso. Pa mas informacion of pregunta por tuma contacto cu ‘Jongerenloket’ na Departamento di Asunto Social na telefon 528-1100.