Pa mas cu 20 aña Aruba a conoce diferente partido politico cu a papia di desaroya San Nicolas den un forsa economico, pero hamas a concretisa esaki. Durante Gobernacion di AVP di 2009 pa 2017 a gaña e pueblo aki cu lo bin cu un hotel y lo a percura pa apertura di e refineria pero cu na final a resulta solamente den un manera pa por genera placa pa amigonan den RDA y otro companianan yega na e Minister Mike de Meza. Desaroyo y prosperidad pa e pueblo di San Nicolas no a bin nunca.
Gabinete Evelyn Wever-Croes a fiha como prioridad pa desaroya San Nicolas y awe 2 aña despues cu e gobierno aki a huramenta, San Nicolas lo conoce un hotel cu lo hiba e nomber “Secrets Baby Beach Resort”, unda cu esaki lo marca e desaroyo di economia di Aruba y ta brinda e yiu di tera y specialmente nos hendenan di San Nicolas e oportunidad di por traha cerca di cas.
Desaroyo positivo pa San Nicolas
Hotel Secrets Baby Beach Resort lo percura pa mas desaroyo economico y tambe desaroyo infrastructural den San Nicolas, unda cu dialuna awo lo cuminsa tambe cu e groundbreaking pa embeyecemento di Baby beach y Rodgers Beach. Den esaki lo crea mas facilidad tanto pa bishitantenan local como turistanan y alabes lo percura pa ampliacion di Baby Beach. Mientras tanto a cuminsa caba cu embeyecemento di Caya di San Nicolas y tambe otro areanan rond di esaki. Y cu esaki lo haci San Nicolas atractivo pa otro inversionannan y proyectonan cu pa 2020 lo ser anuncia y cu lo percura pa crea entrada pero tambe crea cupo di trabao cu ta hopi necesario pa Aruba.
Futuro di refineria y terminalnan
Aña 2020 ta aña di concretisacion tambe di e futuro di nos refineria unda cu den bista di tur desaroyo den San Nicolas actualmente a trece interes di mas cu 25 compania pa cu e refineria. Banda di esaki porfin Aruba tin su terminalnan bek y tambe mester caba di busca e partner corecto pa esaki por cuminsa funciona unda e lo crea entrada directo pa caha di gobierno y lo contribui grandemente pa nos por stabilisa nos finansas cu di 2009 pa 2017, esta durante 8 aña a ser laga na werki. Echo ta cu pueblo tin di sigui lucha pa paga e debenan aki unda cu te aña 2039 nos por yega un Debt/GDP di 50% (na 2009 esaki tabata 43%) y cu na momento cu yega e fecha ey pueblo porfin lo por sinti e alivio, despues di un mal gobernacion yena cu engaño y cumpramento di hende pa por a yega y keda na poder.
AVP den desesperacion
P’esey mi ta pidi pueblo pa no cay den manipulacion di partido AVP cu awo ta den oposicion y hopi desespera pa yega na poder. Gabinete Evelyn Wever-Croes ta trahando cu alma y cuerpo pa cumpli cu Hulanda y muestra di esaki ta cu a logra pa 2020 pa Aruba – despues di 11 aña – lo conoce un biaha un presupuesto positivo, pero cu e placa ey lamentablemente locual nos logra na surplus mester bay pa paga e debe crea pa Mike Eman.
Pa finalisa mi kier a felicita Gabinete Evelyn Wever-Croes den su totalidad, pero specialmente nos Promer Minister Evelyn Wever-Croes, Minister Otmar Oduber, Minister Danqui Oduber y Minister Xiomara Ruiz Maduro pa durante 2 aña largo a traha cu alma y cuerpo pa por a bin cu un desaroyo pa San Nicolas y cu lo nifica un desaroyo economico pa pais Aruba.