Ta un hecho cu e problema di dump ta afecta grandemente e calidad di bida di esnan cu ta biba den barionan cerca di dump. Pero locual tambe ta un hecho ta cu e problema aki ta extende hopi mas leu, e ta afecta henter nos comunidad. Pesey Gabinete Wever – Croes a pone e problema di dump como un punto di prioridad pa atende cu ne. Dump Parkietenbos mester tabata cera pa añanan caba pa diferente motibo manera medio ambiental y salud, pa motibo di e circumstancianan critico di e sitio.
Como un fase transitorio, aña pasa Gobierno a tuma e decision pa cuminsa pone desperdicio den ‘bales’ / empakenan, pa cual a cera un contrato pa dera esakinan na Sero Teishi. Na diferente ocasion Minister Otmar Oduber encarga cu e maneho di medio ambiente a enfatisa cu esaki no ta un solucion a largo plaso, manera cu Aruba tin necesidad urgente den dje. Door di esaki por a limita e cantidad di desperdicio cu ta bay dump, pa evita cu e sero ta sigui crece, conhuntamente cu tur e consecuencianan negativo cu e ta trece.
Mientras cu Aruba no yega na e solucion duradero pa maneho di desperdicio, Gobierno di Aruba ta sigui cu esfuersonan pa limita e dañonan y problemanan como causa directo di dump. E siman aki tin expertonan internacional un biaha mas na Aruba pa sondea otro forma pa limita y mitiga mas cu ta posibel e problemanan serio cu tin na dump.
‘E ley di Serlimar’ manera e ta conoci den comunidad realmente su punto di enfoke ta pa mehora e calidad di bida y salud di comunidad a traves di mehoracion di e calidad di aire y medio ambiente. Un situacion cu no por soluciona mientras cu e reunion pa trata e ley no tuma luga den Parlamento. Banda di esaki, e ley aki ta brinda oportunidad na Gobierno pa tin mas fondo, na momento cu no mester traspasa esaki mas den un ‘diensverleningsovereenkomst’ (DVO) na Serlimar (cumpliendo cu e ley di Serlimar di desde 2005).
Minister Oduber a splica cu Serlimar eorey ta bay tin tres fuente di entrada cual ta: di comunidad, comercio y turista cual ta brinda Gobierno e posibilidad pa por inverti den un ‘Sanitary Landfill’ pa por cera definitivamente Sero Teishi, Dump Parkietenbos y percura pa atende cu e maneho di desperdicio den un fase transitorio. Te ora cu yega na e discusion mas grandi cu mester tuma luga di: Con ta bay atende cu desperdicio aki na Aruba na un forma duradero.
Pa conlcui, comunidad y specialmente e barionan mas afecta pa e situacion di dump, por sigura cu Gobierno ta keda traha pa logra e meta di un solucion duradero pa e problema di maneho di desperdicio na Aruba.