Apenas dos aña pasa Aruba a vota pa un cambio. Un cambio di rumbo, di e rumbo destructivo cu Aruba tabata bayendo aden, pa un rumbo constructivo. Un di e prome tareanan di e gobierno nobo tabata pa pone un fin na e mal maneho financiero y purba rescata Aruba di abismo financiero. Deficitnan di 300 miyon y mas, debe cu a redobla den apenas 5 aña y a yega te na casi 90% di GDP. Esaki a causa cu e economia di pais Aruba a stagna, inflacion a conoce cifranan basta halto, ciudadanonan ta sinti nan desanima, no por a inverti den enseñansa, den cuido di nos grandinan. Ningun hende a pensa cu lo ta facil, sinembargo pueblo a pone su confiansa den e gobierno nobo forma pa MEP-POR-RED, cu un hende muhe na cabes, Evelyn Wever-Croes y un otro hende muhe banda di dje, Xiomara Maduro.
CAFT ya a adverti caba cu lo tuma 23 aña prome cu Aruba por ta bek den e situacion cu Gabinetenan di Nelson Oduber a lag’e na 2009. Pero awor, den apenas 2 aña, nos ta mira e rumbo positivo. Un gobierno cu ta bisa loke e ta haci, y ta haci loke e ta bisa. Un gobierno cu a cuminsa cu baha su propio gastonan, y despues numa a pidi pueblo pa entrega a traves di e crisis tax. Danki na e sacrificio conhunto di e crisistax awor, despues di dos aña, Aruba ta logra crusa e linea di deficit pa e linea di surplus.
Pa aña 2020 Aruba lo mira e prome surplus despues di hopi tempo. Den e 33 aña di historia di nos pais, ta apenas 3 biaha prome Aruba a mira un surplus: na aña 1993 bou Minister Ella Tromp-Yarzagaray (MEP), na 2003 y 2009 bou Minister Nilo Swaen (MEP). Pues e hecho cu 2020 a logra un surplus bou Minister Xiomara Maduro (MEP), ta sigur algo grandi y di celebra.
E debe nacional tambe ta bahando y awor a yega 73% di GDP.
Mes momento economia ta creciendo cu 3% otro aña, segun pronostico di IMF, turismo ta sigui kibra record, desempleo ta bahando, e ciudadano ta sinti su mes mas sigur. Den corto: desaroyo positivo y prometedor.
Ta p’esey mes a actitud di Hulanda pa menasa cu un KB ta asina increible. Un pais cu porfin ta tene su mes na palabracion, cu porfin ta baha su gastonan, incluyendo gasto di personal, cu no ta sucumbi bou presion ni di sindicatonan, un gobierno cu ta bisa loke e ta haci y ta haci loke el a bisa, anto hustamente e Gobierno aki Hulanda kier menasa cu un aanwijzing?!?
Ta obvio cu Hulanda su agenda NO ta pa Aruba bay financieramente riba e bon rumbo, su agenda ta otro. Su agenda ta basa riba sed pa poder, riba kier tin control. Y awor cu nan a topa cu un gobierno serio, nan kier mustra ken tin mas poder. Maske un KB no ta algo deseable, nos no por permiti e agenda scondi di Hulanda pa desvia nos atencion. Nos meta ta: crea un miho pais pa tur ciudadano, especialmente pa nos yiunan y nan yiunan, cu Hulanda kier of Hulanda laga di kier. Pone finansa publico na orden ta e prome paso. DANKI na henter Gabinete Wever-Croes, bou liderazgo di Minister Presidente Evelyn Wever-Croes. Cu Dios bendiciona boso pa sigui hiba nos pais padilanti!