Kralendijk – E konvenshon resien di Dutch Caribbean Nature Alliance (DCNA) tabata un plataforma pa inisio di un fase nobo di maneho internashonal di naturalesa den Karibe Hulandes, ku un enfoke special riba futuro. E tabata un éksito rotundo, unda e organisashonnan enkargá ku maneho di áreanan protehá di e seis islanan, organisashonnan di naturalesa prominente, institutonan sientífiko di Hulanda, stakeholdernan lokal i embahadornan hoben di naturalesa a partisipá den kolaborashon estrecho ku otro. Partisipantenan a uni forsa pa “nos” naturalesa, e ekosistemanan úniko di Reino Hulandes.
Kolaborashon E organisashonnan pa maneho di áreanan protehá di Aruba, Boneiru, Kòrsou, Saba, St. Eustatius i St Maarten ta trahando huntu kada bes mas tantu, pa logra akshonnan pragmátiko pa konservashon di naturalesa den e área Karibense di Reino Hulandes. A kompartí ekspertisio i interkambiá eksperensia. Ademas partisipantenan a siña hopi di otro, kumpliendo asina ku un di e metanan prinsipal di DCNA, esta
pa ampliamente stimulá kolaborashon pa asina salbaguardiá naturalesa den Karibe Hulandes. Tur esaki, tumando na kuenta ku e puntonan ku ta menasa naturalesa ta afektá tur e islanan konhuntamente, ademas di ta interkonektá. Algun di e puntonan aki ta: deterioro di coral, keintamentu di awa di laman, nivel di laman ku ta subiendo, eroshon di tera na e islanan, yegada di espesienan eksótiko invasivo, animalnan ku ta kana liber i kome yerba di forma desproporshonal i daño kousá na naturalesa debí na turismo di forma no-duradero.
Akshon Desafortunadamente, e lista di preokupashon i riesgo por amplia mas tantu ainda i e retonan nos dilanti ta signifikativo. Sin embargo, un base sólido pa tuma akshon a keda establesí durante e konvenshon aki i tur partido a fiha nan bista riba un aserkamentu konhunto pa maneho di konservashon. E aserkamentu aki a haña mas supstansia pa medio di workshopnan stratégiko fasilitá pa World Wildlife Fund (WWF-NL), Vogelbescherming Nederland i International Union for Conservation of Nature (IUCN-NL). Tur e organisashonnan pa maneho di áreanan protehá den Karibe Hulandes i tambe e direktiva di DCNA a partisipá na e workshopnan aki. Esaki ta ilustrá un otro tarea prinsipal di DCNA: trese e parkenan den kontakto ku stakeholdernan internashonal riba tereno di protekshon di naturalesa i konservashon. Como resultado a lanta e Grupo di Trabou enkargá ku Protekshon di Paranan den Karibe Hulandes.
A establesé un vishon komun i un direkshon. Meskos tambe a asigná tareanan basa riba e direkshon komun aki. E siguiente ekspreshon ta válido pa tur e islanan: invershon den naturalesa no ta un luho, pero un invershon krusial den e bienestar sosial i ekonómiko di e abitantenan di e islanan pa futuro.
Lèsnan balioso di naturalesa pa hóbennan Durante e konvenshon di DCNA tabatin atenshon special pa e hubentut di e seis islanan. Di e programanan di Fundacion Parke Nacional Aruba, STINAPA Boneiru, CARMABI na Kòrsou, Saba Conservation Foundation, Saba Nature Education (SNE) i Sint Maarten Nature Foundation, a bini huntu 4 hoben pa partisipá na e konvenshon. Danki na kofinansiamentu di World Wide Fund for Nature, Rabobank i STINAPA, a prepará un programa ku a dura henter wikènt i ku a inkluí ekskurshon i workshop na Parke Nashonal Washington Slagbaai, kaminda e hóbennan a pasa anochi. E tabata un eksperensia úniko unda nan tabatin e oportunidat pa eksperensiá i siña tokante Boneiru su naturalesa, koral, paranan i polushon di plèstik. Esaki tabata un eksperensia sumamente memorabel. Awor, e embahadornan aki lo bai ku e konosementu aki i kompartí e na nan respektivo islanan, ku sosten di nan respektivo organisashon lokal di maneho di naturalesa. Partisipashon di hubentut lo bira un parti permanente di e programa anual di DCNA pa tur seis isla. DCNA ta gradisí tur persona ku a yuda organista e evento impreshonante aki i Warehouse Bonaire pa a kontribuí en grande ku komestibel.
Programa variá pa biólogonan Biólogonan di e organisashonnan di naturalesa lokal na tur seis isla tambe tabatin e oportunidat pa haña konosementu “de primera mano” di e eksperto riba tereno di restourashon di koral Francesca Viridis di Reef Renewal Bonaire, sientífiko spesialisá riba koral Erik Meesters di Wageningen University & Research, e eksperto riba plataforma di siensia (pa siudadanonan) Observation.org Hans Verdaat i Arjan de Groene
di World Wildlife Fund Hulanda. E konosementu ku e biólogonan ku a partisipá lo bai kuné bèk na nan respektivo islanan ta sumamente balioso. Ademas a tuma pasonan importante pa mehora e relashon di trabou entre e Organisashon Hulandes pa Estudio Sientífiko (NWO), sientífikonan i aktornan lokal. E dia a terminá ku un charla grátis pa públiko bon bishitá tokante status di refnan di koral.
Reanudashon trabounan di DCNA Despues di un temporada difísil, DCNA ta komprobá pa medio di e desaroyonan resien, ku e ta forma un ret úniko di organisashonnan prominente den diferente disiplina i un focus nobo riba e berdadero nesesidatnan pa konservashon di e parkenan ta awor un echo. Den e lunanan ku ta sigui lo tin bastante trabou duru pa realisá e plan di akshon.
Siguiente pasonan Un di e resultadonan di e konvenshon di DCNA ta ku diferente statement konhunto, aktualmente den konsepto, lo keda entrega na e gobièrnunan lokal i esun di Hulanda. E statementnan ta toka e kondishonnan nesesario pa salbaguardiá maneho di naturalesa pa futuro di tur seis isla.
Pa mas informashon por fabor tuma kontakto ku DCNA na: (+599) 717-5010 òf [email protected]