Diahuebs mainta Gabinete Wever – Croes a tene un rueda di prensa na San Nicolas den e bunita museo industrial ubica den watertoren San Nicolas pa anuncia algun desaroyo sumamente positivo pa pariba di nos isla. A anuncia e fecha di 14 di november cual lo bira e dia historico cu ta duna inicio na construccion di e hotel Secrets Baby Beach Resort. Pero tambe na mesun ocasion conhuntamente cu esnan di Arubaanse Wegenbouw Maatschappij (AWM) y DOW, a tuma luga Groundbreaking di trabounan di renobacion den Mainstreet San Nicolas.
Despues cu e caya di Promenade San Nicolas a keda renoba, awor sigur a toca turno pa continua cu realisacion di e plannan pa percura pa renoba Mainstreet San Nicolas. Den su prome fase lo incia cu e trabounan prome cu december y continua cu esaki na januari. Lo renoba e caya completo manera cu a tuma luga cu Promenade. Di e forma aki pa sigui duna empuhe y sosten na e trabou cu San Nicolas Business Association ta haciendo, pa impulsa tur esnan cu tin un negoshi,y pa nan tambe inverti.
Proyectonan pariba di nos isla
Tin diferente proyecto andando bou di diferente cartera manera cerca Minister encarga cu Turismo Dangui Oduber y tambe cerca Minister encarga cu Transporte Chris Romero. Cu ta proyectonan basa riba hecho y realidad cla pa start cu colaboracion di diferente departamentonan cu mester ta envolvi.
Banda di esaki comunidad por a tuma nota di trabounan cu ya caba ta tuma luga manera na Carnival Village caminda ta mira cu lo tin 6 negoshi chikito adicional pa e hendenan pariba di nos isla den e sector di F&B, cafe, ambiente entre otro. Pariba di nos isla tambe ta conta cu un oficina di turismo completamente renoba y sin lubida e diferente museonan cu tin na San Nicolas, cu tur dia ta ricibi bishsita di turista. Tur esaki ta mustra cu e vision poni dilanti di parti Gabinete Wever – Croes, ta hayando su fruto!
