Celebrando Kiwanis One Day 2019.
Tur aña e ultimo diasabra di Oktober, e famia di Kiwanis ta bini hunto riba un dia y asina duna bek na comunidad. Esaki ta wordo hasi riba nivel internacional, pero tambe aki na Aruba ta duna e dia aki su atencion mereci.
K1 day a tuma lugar dia 26 di oktober na Pius X school na Dakota. Aki Kiwanis Club of Palm Beach hunto cu Kiwanis Club of Young Professionals a organisa e dia pa hunto celebra e voluntarismo cu ta biba den cada un miembro. Tambe tabata tey presente e hobennan di Circle K di Universidad di Aruba, Builders Club di Colegio San Antonio y K-Kids di Prinses Amalia Basisschool. Aki ta papia di cinco club cual ta alrededor di 70 persona. Sin laga afo e tremendo esfuerso di e team di docente y mayornan di Pius X mes cu a sa di duna un man durante e dia aki.
Apesar di un solo fuerte, cada un presente tabata tin e animo y sonrisa riba nan cara pa asina por caba e trabou nan riba e speelplaats, speeltuin y tambe por a admira e cabayero nan drechando e dak di gazebo nan pa por duna poko mas lugar adecuado pa e alumno nan. Apart di a verf, drecha schommel, drecha dak tambe e club nan a percura pa planta mata pa e scol.
Trabou tabata tin sigur na gran escala na Pius X school. Un cos ta sigur, locual a logra hasi, dialuna por mira un sonrisa grandi riba e mucha nan y docente nan cara.
Un danki special ta bai na Butterfly Farm, DOW, Fantastic Gardens, ATCO, Tropical Bottling, Safe More Food Stores, Santa Rosa, Kooyman y Dakota Take Away. Sigur cada un a contribui pa K1 day tabata un dia exitoso.
E famia di Kiwanis ta sigui crece y sigui yuda comunidad unda mas tin mester cu concentracion riba e mucha nan.