Diaranson mainta a tuma luga na Renaissance Convention Center e Energy Summit en conexion cu e vision di Gabinete Wever-Croes riba e tema di energia. Gobierno di Aruba, desde cu a sinta, a cuminsa recalibra su maneho di energia. Esaki pasobra Aruba no tawatin niun vision cla. Gobierno anterior tawata promove un vision pa un pais liber di fossil fuel pa 2020, pero e maneho no tawata dirigi riba e vision aki, tampoco e stakeholders tawata alinea riba e vision ey. Pio ainda, a bin resulta cu algun di e companianan mas importante den logra e meta aki, no tawatin e vision aki pa Aruba ta liber di fossil fuel pa 2020. Den consulta cu stakeholders Gobierno di Aruba a yega na e conclusion cu e meta aki tawata irealistico, y nos mester re-calibra nos maneho.
Pa e motibo aki, a organisa e Energy Summit pa scucha di otro, y pa hunto delinea e metanan pa nos pais. Pa nos tin un maneho alinea, cu metanan cla, cu ta den cumplimento mas tanto posibel cu palabracionnan internacional pero principalmente metanan realistico cu nos pais,
nos companianan y principalmente nos pueblo por carga. Prome Minister Evelyn Wever-Croes a duna un discurso na unda el a elabora riba e vision di energia di Gabinete Wever-Croes.
Sector di energia ta importante pasobra e ta afecta henter nos pais. Algun ehempel di esaki ta: – Sector di energia ta afecta e cartera di nos hendenan
– Sector di energia ta afecta nos economia den su totalidad – y inflacion tin un impacto macro economico; importacion di fuel ta afecta nos balansa di pago, y pa e motibo ey tambe nos mester pone prioridad na e tema aki.
– Sector di energia ta afecta nos medio ambiente y e tin impacto riba cambio di clima.
Gobierno su maneho principal ta pa pone e ser humano central. P’esei mester tene cuenta cu tur e aspectonan aki ora cu ta recalibra e maneho di energia. Pues;
– E habilidad di nos hendenan pa por paga nescesidadnan basico manera awa y coriente;
– E impacto di energia riba balansa di pago y reserva di devisas;
– Y e impacto riba cambio di clima.
Tambe, como parti di nos programacion di Gobernacion, Gobiero a adopta e “Sustainable Development Goals” di Nacionnan Uni; e asina yama “SDG’s”. Den SDG’s energia tambe tin un rol masha importante. Durante e summit, e comision di SDG Aruba a duna un presentacion amplio riba e tema aki. Durante e Asamblea di Nacionnan Uni na New York recientemente, Cambio di Clima tabata na e top di e agenda. Un cantidad di paisnan a comete nan mes pa yuda combati cambio di clima door di reduci nan emisionnan.
“Nos na Aruba no por keda atras. Desde 2018 nos ta papia riba e sector di energia y awor nos mester bin cu plannan concreto. Gobierno, como parti di su maneho, ta carga e responsabilidad pa esaki pero nos no kier haci’e nos so, nos a dicidi cu nos ta haci’e huntu cu boso. P’esey nos a convoca e Energy Summit aki”, tawata palabranan di clausura di e discurso cu Prome Minister a dirigi na esnan presente na e Energy Summit diaranson mainta.
For di e summit aki, for di banda di Gobierno a duna direccion riba e desaroyo cu Gobierno kier mira pa locual ta trata Aruba su sector di energia. Cu e summit aki Gobierno kier logra defini metanan concreto di e vision di energia di nos pais cu tur ta para nan tras, y e plannan concreto pa logra esaki. Despues Gobierno lo presenta e vision y plannan na Parlamento y na comunidad, local y internacional.
“Energia no ta algo solamente di nos companianan di utilidad. E ta algo di henter comunidad. P’esey mi ta urgi pa hunto nos delinea e futuro di energia na Aruba, no pa nos, sino pa nos yiunan y nan yiunan”, Prome Minister Evelyn Wever-Croes a enfatisa.