Parke Marino Aruba: Plan di Maneho oficialmente entrega na Gobierno di Aruba

Oranjestad, Aruba – Awemainta na Mangel Halto den presencia di Minister di Desaroyo Teritorial, Infrastructura y Medio Ambiente Sr. Otmar Oduber, Hunta di Supervicion di Fundacion Parke Nacional Aruba (FPNA) y Director General di FPNA, oficialmente a entrega e Plan di Maneho Preliminario cu a wordo crea pa Parke Marino Aruba.
Parke Marino Aruba ta e resultado di e projecto funda dor di EU Best, unda TNO Caribbean hunto cu Directie Natuur en Milieu, y Ministerio di Desaroyo Teritorial, Infrastructura y Medio Ambiente a colabora pa realisa e establecimento legal di e areanan di Parke Marino Aruba, un documento primario y e apuntacion di FPNA como manehador. FPNA, como manehador di e areanan a keda encarga pa produci un plan di maneho cual a entrega awe.
E plan di maneho actual ta uno teoretico y ta enfoca ariba e metanan cu kier logra y kiko lo mester wordo realisa pa maneha e areanan protehi den un forma cu lo cumpli cu e metanan aki. Siguientemente, e plan ta inidica un periodo transitorio di 2 aña, unda lo pone enfasis riba duna informacion, participacion y consultacion di stakeholders, sondeo y investigacion, amplia conservacion marino, crea capacidad den organisacion y establece un financiamento sostenibel. A base di e progreso y informacion colecta durante 2 aña aki lo sigi elabora e plan di maneho pa asina e contenido bira uno mas practico encuanto e reglamento pa Parke Marino Aruba y su maneho.
E establecimento y maneho di Parke Marino Aruba cu su 4 areanan protehi ta un tremendo paso pa conservacion di bida marino rond di Aruba. E areanan aki ta encera ecosystemanan importante pa e biodiversidad marino manera mangelnan, rifnan y yerba di lama. FPNA ta spera cu tur hende lo sigui haci nan parti hunto cu FPNA pa logra proteha nos lama, un recurso natural sumamente importante pa Aruba su habitantenan y bishitantenan.
Pa mas informacion encuanto e plan di maneho pa Parke Marino Aruba por lesa esaki riba website di FPNA: www.arubanationalpark.org. Si tin cualkier pregunta por tuma contacto cu Fundacion Parke Nacional Aruba na [email protected].