Parlamentario Endy Croes ta refuta despues di por a scucha Mike Eman yora den conferencia di prensa culpando tur hende, te hasta Ministerio Publico cu e mundo aki ta echt riba su cabes. Danki pueblo di a suta Mike Eman den ultimo eleccion unda AVP a bay atras cu mas di 10 mil voto y asina e potlood di pueblo a scapa e baranca Aruba. Imagina bo si AVP mester a bolbe un biaha mas? Esaki lo tabata final di nos isla tan stima. Esey lo a significa cu Avestruz Benny Sevinger lo a sigui cu su practica di negoshi di tereno den gran escala.
E caso di Espinosa
Por a scucha Mike Eman compara e caso di Espinosa cu e caso aki di Benny Sevinger. Stop di tuma hende haci y stop di tuma e pueblo pa kens. Caso di Benny Sevinger ta un caso hopi pero hopi grandi cu masha hopi instancia y departamento envolvi. Duna tempo tempo. E caso di Espinosa tabata trata di dos caso. E promer ta trata di ekiponan di gobierno cu nan a hiba cas y despues a entrega bek na gobierno y e caso aki Ministerio Publico a seponeer es decir no lo persigui Espinosa mas como cu gobierno a haya bek locual na promer instante nan a hiba. E di dos caso tabata uno relaciona cu radionan di polis y den e caso aki Espinosa a wordo condena hunto cu Speed Andrade unda Speed den sentencia di 15 di juli 2019 a ricibi un castigo di 240 ora di trabao y Espinosa a ricibi un castigo di 180 ora. Pues si Mike kier usa Espinosa nos lo bay dedica ful un conferencia na su persona pa mustra con Mike Eman ta manipula atrobe.
Presion di AVP
Por a tuma nota cu e sapatonan bieu di AVP manera Baba Herde, Donkey Tromp, Dowers tur tabata den rij para tras di Mike Eman momento Mike Eman tabata caba cu Ministerio Publico tratando na pone presion pa stop e investigacion contra Benny. Tristo si pa mira Michael Lampe y Robert Candelaria kendenan supuestamente ta hiba un politica moderno y pio ainda Candelaria cu sa bon bon con e proceso ta cana ta para banda di Mike Eman insultando y cuestionando Ministerio Publico. Het kan verkeren! Parlamentario Croes ta termina bisando pakico tanto miedo? Si no tin nada di sconde y si no tin ningun temor anto laga e proceso cana su camninda Sin miedo!
