Diabierna ultimo a tuma luga entregamento di premio na ganadonan di e concurso di pintamento ‘Stima bo Cacho’. Esaki tawata un concurso di pintamento hopi exitoso na unda cu un total di 409 pintura a wordo entrega y un total di 29 scol participante. Nos muchanan a mustra no solamente di tin talento sino nan a demostra e sentimento bunita pa nan mascota a traves di pintura.
Apesar cu tawata dificil pa saca e mihonan, Petit Comité, e comision encarga cu e Plan Nacional cu ta atende cu e problematica di cacho riba caya, cu ta esnan cu a organisa e concurso di pintamento aki, a saca 12 ganado: Ashwary Haniff, Torunn Jiao, Alfonso Blanco, Jahmar Fingal, Amir Angela, Azea Stooter, Jouelle Farro, Angelina Almary, Serena Morrison, Aryana Baroud, Maria Teresa Rodriguez y Gerwayne Marval.
Prome Minister Evelyn Wever-Croes a ricibi e ganadonan hunto cu nan mayornan hunto cu Minister Glenbert Croes, Minister Andin Bikker y Minister Rudy Lampe. Na e ocacion, Prome Minister a gradici Petit Comité pa e proyecto bunita aki pa conscientisa tanto muchanan como mayornan riba cuido di nos cachonan y cu e responsabilidad ta di nos tur y di tur cu dicidi pa tin un cacho como mascota. Tambe Prome Minister a gradici cada mucha y mayor presente.
Muchanan a haya hunto cu un regalito, nan pintura poni den un bunita leishi pa asina nan tin’e como recuerdo di e prome concurso di pintura pa trece conscientisacion riba cuido di cacho. Prome Minister a encursha e Petit Comité pa sigui cu proyectonan buntia asina pa nos muchanan.
