Diaranson 2 di oktober a cuminsa cu tratamento di e cambionan pa loke ta e ley di Serlimar di 2005 den parlamento. E ley den su concepto cu a ser entrega na parlamento tin como meta pa percura pa Serlimar ser stabilisa financieramente pero tambe trece solucion pa e dump di Parkietenbos y percura pa por tin un solucion a largo plaso pa e problematica di sushi. Den e proceso aki nos a scucha hopi instancia cu a vocifera nan preocupacionnan pa e cambionan den e ley aki unda nos a scucha entre otro Kamer van Koophandel, ATA, AHATA, Ecotech, habitantenan di vecindario di Dump.
Crea balance den ley
Nos como parlamentario y manera nos constitucion ta duna nos e autoridad di por trece cambionan den ley – despues di scucha tur persona, grupo y compania preocupa – a cuminsa e proceso di dialogo cu gobierno relaciona cu e preocupacion existente y alabes tambe nos a prepara algun amienda p’asina por trece balance necesario den e ley pa e por tin e draagvlak di pueblo cu ta para cu mester bin un solucion pa dump y tambe pa tin un maneho concreto pa locual ta desperdicio na Aruba
Cambionan den e ley
Manera cu reunion a cuminsa Minister di Infrastructura a trece e prome cambionan den un nota di cambio cu nos a bin ta dialoga a raiz di combersacionnan cu diferente grupo. E prome cambio ta e reparticion entre beheer y ophalen unda cu esaki lo bira 10 florin pa beheer y 15 florin pa ophalen (prome esaki tabata 17,50 y 7,50). Otro cambio importante ta e cobransa dobel unda cu si bo ta biba y bo negoshi ta inscribi na bo mesun cas mester a paga pa cas y pa negoshi tambe. Esaki a ser cambia y ta cobra pa un servicio. Si bo negoshi ta inactivo tampoco lo no paga. Si bo tin mas negoshi inscribi bao di un solo dak tambe lo paga un solo biaha y no pa negoshi registra. Banda di esaki tambe lo bin cambio riba dos otro articulo unda cu sigur lo tin di evalua e ley aki y asina por tin un mihor bista riba uso di fondo pero efectividad tambe di e ley.
Ainda tin varios cambio y discusion di articulonan
Ainda nos no ta cla y lo sigui dia 15 di oktober y ainda nos ta bezig cu discusion riba algun punto. Pero esaki ta muestra cu nos di parlamento ta scucha comunidad y ta haci e cambionan necesario. No ta tur cos por ser cambia y sigur tur esnan cu nos a reuni tambe sa esey. Spera cu oposicion por siña di nos pasobra na lugar di bin solamente cu critica por bin dilanti y duna nan contribucion real.