Na tur boluntario y compania cu a yuda cu limpieza di Ser’i Noka… Go Cultura y Parokia di Santa Cruz ta bisa danki!

Diasabra ultimo a tuma lugar un gran limpieza den e teatro y parke di Ser’i Noka.
Tabata un mainta impresionante caminda e gran mayoria di esnan presente tabata muchanan y hobennan cu a trece nan famia pa asina nan asisti durante e hazaña aki.
Esnan presente no solamente a pone man na obra y a haci un gran esfuerzo pa laga e area aki limpi, pero nan tur a disfruta inmensamente haciendo esaki.
Tur hende a siña mas tambe di e historia di e teatro di Ser’i Noka y dicon e area ta asina special pa hopi di nos localnan.
Tabata un lastima si pa mira cuanto sushi nos propio ciudadanonan a laga atras den e parke unico aki cu ta un herencia natural valioso cu mester wordo proteha y traspasa pa nos futuro generacionnan.
Un momento historico y inolvidabel tabata ora cu a planta un mata di Tuturutu (poinciana) pa simbolisa e comienso di un era nobo pa Ser’i Noka.
Esaki ta e prome di e variacion grandi di mata local cu lo wordo planta den Ser’i Noka.
Cu presencia y participacion di un di e visionario y pioneronan tras di e creacion y construccion di Ser’i Noka na aña 1963, Sr. Domi Tromp hunto cu su esposa Sra. Yvonne Tromp-Frans cu tambe tabata masha importante den realisacion y promocion di e anfiteatro, esnan presente por a experencia un momento hopi emocionante cu plantacion di e mata aki.
Sr. Domi Tromp a expresa cu orguyo: “Porfin! Porfin Ser’i Noka ta bay haya bida bek! Danki pa boso trabao duro!”
Sra. Yvonne Tromp cu un sonrisa grandi riba su cara tabata conta di su tremendo recuerdonan di Ser’i Noka. Specialmente di e obra “Maria di Ser’i Noka”.
Hunto cu tur presente y tambe famia di Sr. y Sra. Tromp, a clausura un dia special y hopi memorabel.
Fundacion Go Cultura y Parokia di Santa Cruz, encabeza pa Pastoor Jairo Maduro ta gradici tur cu a yuda inmensamente.
Tur e balentenan presente, specialmente tur e muchanan y e hobennan ehemplar, a demostra con nos por bini hunto pa logra un causa importante y duradero.
Danki special na Fantastic Gardens pa a regala Ser’i Noka e mata unico aki.
Aruba por ta sigur y orguyoso di e meta pa cu Ser’i Noka: No solamente rescata, restaura y renoba e anfiteatro den aire liber, pero tambe proteha e flora y fauna den henter e area y hasta añadi mas vegetacion pa eleva esaki aun mas.
Danki na Serlimar y su ekipo cu ya desde diabierna mainta ta haciendo e trabaonan grandi di limpieza den henter e area.
Danki na Ecotech cu tambe a uni su mes na e causa aki.
Danki na Hoori NV pa provee nos cu saconan pa hinca sushi aden.
Danki na Tropical Bottling Company/Browerij Nacional Balashi pa e awa, iced tea, malta Balashi y refresco pa refresca.
Danki na Dasem Services cu a provee ijs pa por fria bebidanan pa e boluntarionan.
Danki tambe ta bay na Don Pastechi Factory cu a alimenta e boluntarionan cu dushi snacks.
Un danki hopi special na Vibration PR & Media pa su bon cooperacion pa invita pueblo di Aruba na e limpiesa.
Na prensa y media local, danki inmenso pa a yuda comparti e noticia di e limpieza aki.
Trabao no a caba ainda. Esfuerzonan ta sigui pa e causa historico aki.
Pues nos ta gradici tambe tur esnan cu a y lo haci nan donacion financiero pa asina hunto nos por rescata nos patrimonio nacional.
Esaki tabata djis e comienso di e rescate di locual cu tin, djey sigui pa restauracion y renobacion.
Dentro di poco Aruba lo conoce y disfruta di un anfiteatro sumamente bunita cu un y tur por tin acceso na dje pa proyectonan positivo.