Home Sports Clubnan Division Honor a ricibi tayer di structura di AVB

Clubnan Division Honor a ricibi tayer di structura di AVB

SHARE

ORANJESTAD, Aruba: Arubaanse Voetbal Bond (AVB) a tene un tayer p’e clubnan di division honor riba e cambionan cu ta aplicando. AVB ta den un proceso y ta conta cu sosten di Gregory Engelbrecht, Sport manager Consulting, pa promove mas profesionalismo, miho organisacion den e famia di futbol di Aruba. E idea aki a cuminsa 2 aña pasa, pero ful e proceso di haya aprobacion cu structura di FIFA, a tarda un poco.

A cuminsa cu e di 2 parti di esaki y den e dianan aki Gregory Engelbrecht a delibera cu stakeholders di AVB. El a cuminsa sinta prome cu e bestuur di AVB, cu e staff di AVB y despues cu clubnan di Division Honor. Tambe e lo reuni cu Division 1 y otronan pa asina tur hende y grupo di AVB por ta riba e mesun liña di structura. A forma un kader pa tur tin e mesun comprendimento y e obhetivo ta pa tur grupo compronde nan rol y e contexto di structura di AVB. Esey lo yuda e eficiencia di comunicacion, pero tambe e tipo enfoke cu nan tin pa loke ta nan rol si ta di miembro di bestuur.

Tur esaki ta loke ta spera di nan, kico nan tin cu aporta, segun Gregory Engelbrecht. Si ta un club esey ta e contexto cu ta spera di bo, pa nan por haci nan trabou y sigui enfoca riba loke nan mester p’e organisacion ta mas eficiente y cuminsa traha na un forma mas profesional.

Tambe e ta yudando cu e funcionnan den AVB pa por atrae personanan cualifica pa e trabou, pasobra aworaki falta.

E feedback cu Gregory Engelbrecht a ricibi den e prome parti di presentacion tabata bon, hopi pregunta a bin dilanti. Por a mira cu hopi cos tabata prikkel, un tiki mas operacional y mester saca nan un tiki mas afo y haci esaki mas strategico. Esaki ta pa nan ta un tiki mas riba nivel cu AVB ta pensa prome cu bay e siguiente stap di operacional.

Na final di dia lo traha un rapport kico tur ta e cosnan mas importante cu e clubnan ta haya. Esaki ta e prome stap. E idea ta pa yuda e clubnan desaroya y yega mas leu, pasobra tur kier ta e miho, funciona miho y tin facilidadnan pa ofrece hungadonan.

Hopi club tin hende nobo, pero tin pensamento anticua y tin cierto manera di traha. Tin manera pa cambi’e y AVB sa di dje, pero e ta un proceso cu ta bay pocopoco. Discusion ta hopi importante, comparacion di ideanan, mustra otro kico ta haci y ora ta haya e pensamento cu si esey por mi tambe por. Na final e opcion ta keda na e clubnan mes, FIFA ta pone par di rekisito y ta pone bo pensa riba e direccionnan. AVB mester cumpli cun’e y e clubnan mester cumpli pa keda fit den e direccion ey. Tin cierto reglanan cu AVB tambe mester sigui. Na final e responsabilidad di e direccion cu AVB ta bay ta parti di e responsabilidad di e clubnan.