Oranjestad, Dia 12 di october ta Dia Mundial di Reuma y ta haci uzo di e dia aki pa cuminsa cu conscientisa kico ta Reuma y con pa biba cu Reuma. Desde januari 2019 Centro di Reumatologia di Dr. Horacio E. Oduber Hospital a habri su portanan y pa prome biaha lo bay tene anochinan informativo pa pashent y interesadonan. Ta organisando tres anochi di informacion durante luna di october den 3 diferente bario di Aruba.
Ta invita tur pashent di Reuma pa e tres anochinan di informacion, den cual lo bay ilustra kico Reuma ta y con pa bay om cu esaki. Ta lantando un organisacion di Reuma cu tambe kier conta kico nan por nifica pa e pashentnan y kico por spera di nan. Lo tin dos otro orador cu lo elabora riba un estilo di bida cu Reuma y ki consehonan por duna y tambe lo haya un presentacion riba con pa move cu Reuma. Esey tambe hopi biaha ta un problema. Bo tin dolor y keho y riba dje bo tin cu move pa bo sinti bo mes miho. Riba esaki tambe lo bay tin informacion.
E pashentnan cu yega Centro di Reumatologia ta bin cu verwijsbrief di nan dokter di cas. Pashentnan cu ta bin na Centro di Reumatologia cerca dr. Rashidi Rellum, ta pashentnan cu por tin reumatoide artritis, tambe ta bin hendenan cu tin artrosis, jicht y hopi otro tipo di pashent cu tin un ke otro tipo di reuma.
Dia 12 di october e anochi di informacion lo ta na MFA Paradera, dia 19 di october e anochi di informacion lo ta na MFA Noord y dia 26 di october e lo ta na MFA Savaneta. Tur e anochinan di informacion lo cuminsa pa 6:00pm y ta termina 9:15pm. Entrada pa e anochinan di informacion ta completamente gratis.
Si ta posibel por registra via [email protected] of por yama libremente 527 4216, pa asina tin un bista cuanto hende lo bay bin riba e anochinan di informacion.
Asina ta bini uni bini tur, pasa na un di e tres dianan, sea dia 12, 19 of 26 di october, na e MFAnan indica, pa asina haya sa un tiki mas kico ta Reuma y con pa biba cu Reuma.