Parlamentario Endy Croes no por compronde con sostenedornan di AVP y candidatonan di AVP kier cuestiona e investigacion como un persecucion politico. Manera colega Rocco Tjon a splica ampliamente den un programa na radio recientemente con e proceso aki ta hinca den otro y con e ta cana. Promer cu inicia cualkier investigacion tin un comision di Husticia cu ta wordo instala pa valida tur informacion. Nan ta dicidi si den nan opinion tin base legal y si tin sospecho contra un of mas persona envolvi promer cu bay over na duna e luz “berde” pa inicia cu un investigacion. Pa nan por inicia cu e investigacion nan mester un permiso di Hues Comisario pa asina por tin accesibilidad na diferente metodo cu por wordo usa. Pues tur e evaluacionnan aki ta wordo haci pa organonan imparcial den Husticia unda nunca por tin influencia politico den esaki. E comision aki ta scoge cual departamentonan tur ta wordo encarga cu e investigacion. Den caso di Benny Sevinger esta e caso Avestruz nos por a tuma nota cu Cuerpo Policial, Landsrecherche, R.S.T. y otro funcionarionan Hulandes ta encarga cu e caso aki. Pues ningun pero ningun momento por trata na trece duda den nos aparato hudicial cual ta funciona na un manera completamente independiente.
Bendemento di tereno di pueblo
E investigacion AVESTRUZ relaciona cu amigonan di Mike Eman, Benny y AVP basicamente ta enfoca riba amigonan esta Friends & Family di AVP kendenan a ricibi optie riba terenonan comercial cu su famoso firma y texto di Benny ‘Dezerzijds akkoord, gaarne uw medewerking’ y despues ta bende shares di e NV unda automaticamente e optie comercial ta bay cu e shares di NV a cambio di pago di miyones cu ta pasa riba cuentanan bancario entre otro na Panama y of Miami. Di acuerdo cu informacion Benny tabata honra opties na tereno comercial riba NV cu no tabata ni lanta ainda. Un prueba sigur ta un caso di Deshaun NV di Leoncita Arends. Banda di esaki nos por a tuma nota cu Benny “Avestruz Sevinger no tabata respeta ni veredictonan di Hues y ta reforsa su expresion den Parlamento ‘I don’t give a damn!’
Di tereno residencial pa comercial
Parlamentario Endy Croes ta sigui splica di ta corda con Hues A. van de Leur den un sentencia di 21 di januari 2016 a duna un orde maatregel contra Benny Sevinger prohibiendo Benny pa cambia destinacion di un tereno residencial pa un tereno comercial. Pues te hasta tereno residencial Benny tabata firma y converti esakinan den tereno comercial pa asina e fiesta por a continua. Hues a bisa textualmente den su veredicto di 21 di januari 2016 lo siguiente: “Dus aldus te handelen heeft het Land naar het oordeel van het Gerecht willens en weten de rechtsgang gefrustreerd en heeft het Land willens en wetens geknaagd aan de wortels van de rechtsstaat. Het Gerecht, beslissende op het verzoek tot het geven van een ordemaatregel verbiedt het Land om over te gaan tot wijziging van de bestemming naar commerciele bestemming en of horeca bestemming te Saliña Cerca 23 H”. Esaki ta un di e ehempelnan unda ciudadanonan mester a bay corte pa para Benny Sevinger di fiesta cu tereno y patrimonionan di pueblo. Asina tin hopi mas.
AVP no conoce integridad
Parlamentario Endy Croes ta trece esaki dilanti pa recorda pueblo y sostenedornan di AVP cu no ta algo di awor cu te hasta Hues a stop Benny pero muy probablemente e placa tabata drenta na granel riba cuentanan den exterior tanto na Panama y na Brickel Miami y ken sa kisas na Colombia. Aparentemente e caso Avestruz aki ta trata di un caso 10 biaha mas grandi cu caso IBIS di Paul Croes, esta otro caso coruptivo di Ministernan di AVP. Den caso IBIS Paul Croes di AVP a duna mas di 2000 ontheffing pa permiso a cambio di placa y comestibel na Chines cual tambe ta un caso sumamente tristo. AVP no conoce integridad. AVP ta sinonimo di e propaganda na Canal 90 di Leoncita esta ‘haci mi miyonario’. Duna tempo tempo y duna Ministerio Publico su espacio y momento cu e caso aki bin dilanti caminda e rekisitor di fiscal lo bay ta decifrando un mafia y e corupcion di mas grandi den historia di Aruba. Afpak Team lo mester wordo activa na su debido tempo tambe pa Land Aruba por recupera su perdidanan miyonario. Hopi kisas awe ta spanta pero Benny a manda bisa tur su amigonan dos cos cu pa Benny ta importante: El que nada debe, nada teme y finalmente el a bisa hopi tof y sin gevoel den Parlamento di Aruba e cas di pueblo, I don’t give a damn! Ban mira awor kendenan tur ta keda tof te final. E bala a cuminsa lora!