E ultimo dos dianan nos por a tuma nota di e racha di articulonan y video na unda e makinaria di propaganda ala Goebels di Otmar ta trata na desvia atencion di e motibo y consecuencia cu e ley cu lo wordo debati den parlamento lo bay nifica pa nos pueblo. Otmar, manera ta su custumber, ta ataca e mensahero sin cu na ningun forma ta contradeci e ponencianan presenta.
Nos a tuma nota cu ta purba di brainwash na prome lugar e trahadornan di Serlimar y despues nos pueblo, bisando cu sin e cambio di e ley aki, existencia di Serlimar ta na peliger y cu ta dor di e cambionan aki existencia ta wordo sigura!
Wel wel! Bay tin curashi!! Ta e ley “Instelling Serlimar, AB 2005 no.5” a percura cu e desangramento cu a tuma lugar dor di e gobierno di Henny Eman, a ser para. Danki Dios cu na 2001 a bin un gobierno nobo cu a pone bida bek na Serlimar. E ley di 2005 cu a haci Serlimar un “zelfstandige bestuursorgaan” (ZBO) a trece salbacion. E tempo ey AVPOR no a vota na fabor y Otmar tampoco, pasobra e hunto cu Tico Croes kier a “get rid” di Serlimar y bin cu Aruba Bunita NV, cu nos a tendé admiti esaki tambe, pero papiando comosifuera cu e no tabata parti di esaki. Esaki ta un manipulacion den optima forma. Es mas e ley di 2005 a percura pa e companianan priva riba e tereno aki, tambe funciona banda di Serlimar.
E intencion di Otmar ta conoci. Esta sigui previlegia su sponsornan di carnaval cu e.o. contract miyonario na Sero Teishi. Pa paga mas di 15 miyon na e mesun sponsor pa e incenirator chikito cu Otmar a “sjoemel” y via corupcion administrativo a dune. Pa cubri e huur exhorbitante di e edificio na Pos Chikito, tambe cerca financiador di campaña y e posternan pa su amiguito haya pa por print, etc etc.
E cambio di ley no tin nada di haber pa garantisa existencia di Serlimar, pero pa Otmar keda complace cu e miembronan di su Cartel cu awor a wordo amplia cu e compania STRANHERO cu lo bay haya un MONOPOLIO riba e desperdicio cu Aruba ta produci.
Y “guess what”, Serlimar lo no tin NINGUN beneficio “whatsoever”. E cambio aki ta pa yena saco di e MULTINACIONAL stranhero aki. Dios sa cuanto ta keda tras pa yena saco di Otmar. Kizas ta p’esey el a rabia cu “La Familia” pasobra Otmar a bira mucho “greedy”?
Pakico nos ta bisa esaki. Desde cu Otmar tabata den forma parti di AVPOR, e compania cu awe e kier saca su gal riba dje tabata wordo previlegia. E mesun modus operandi a wordo sigui ora a cera un contracto miyonario cu nan. Aki e ruman di Otmar tambe ta den touw!! Y awor diripente e mesun hendenan aki a bira diablo!! Wel wel.
Nos no mester defende e compania aki, nan mes lo por haci esaki, loke si nos ta haci ta informa y adverti pueblo di e VENENO cu tin scondi den e cambionan di ley di Serlimar. Si enberdad e tarifanan y esnan inscribi na KvK ta e salbacion di Serlimar y ta urgente pa pasa esaki, pakico anto no ta pasa esey so y laga e parti cu ta regla e MONOPOLIO y e Serli-bank afo por lo pronto!! Pero no ta e dos asuntonan ey ta e intencion real di Otmar.
Ta p’esey diaranzon dia 2 di october 2019 ta un dia importante. E dia ey nos lo haya sa kende ta para pa e pueblo y kende ta para pa e compania STRANHERO y pa yena saco di Otmar. Corda e caso di HOH ta identico, a deal cu mafia, a usa yen di “sprookjes-verhalen” y mira kico a pasa y ta pasando!