ORANJESTAD, Aruba – Ultimo dianan aki e discucion ta birando mas y mas riba e tarifanan nobo cu lo drenta na vigor desde dia 1 di januari 2020, si acaso Ministernan Otmar Oduber, Xiomara Maduro y Andin Bikker haya aprobacion di por lo menos 11 Parlamentario pa adapta e ley di Serlimar. Cu e cambio di ley aki, Gobierno lo obliga TUR hende cu tin un meter di awa pa paga Afl. 17,50 pa luna independente si nan ta cliente di Serlimar of no. Esaki ta pa cubri maneho di desperdicio na Aruba manera trabou cu Serlimar ta haci banda di recogemento di sushi residencial, por ehempel piki bestia morto riba caminda, etc. Esey ta costa mas di dos biaha cu e trabou di bishita e mas di 30 mil casnan tur siman na Aruba.
Di acuerdo cu e proposicion di ley, EcoTech lo mester aumenta e locual e ta cobrando tur su clientenan mensualmente cu Afl. 17,50 tur luna y pasa e placa ey pa Serlimar. Consecuentemente, clientenan lo por scoge entre paga Afl. 25,00 pa luna na Serlimar of paga Afl. 45,60 pa luna cu EcoTech. Esaki pasobra cu e cambio aki, Gobierno a dicidi cu e componentenan cu ta forma e Afl. 25,00 pa Serlimar ta encera Afl. 17,50 pa e maneho general y solamente Afl. 7,50 ta pa bishita e cas di cliente 4 bes pa luna. Pues segun Gobierno, ta costa Serlimar solamente Afl. 1,87 pa bishita un cas, sea unda e ta situa na Aruba, un bes pa siman. Pues bay e cas, recoge su sushi cu un chauffeur y dos empleado patras riba e truck, pagando diesel, cubriendo mantencion di e truck y hiba e sushi pa procesa.
E tarifa ey ta asina bou cu ta imposibel competi cune. Ta mas cu bisto cu e suma ey no ta alcansa pa e trabou ni e gastonan di operacion. Pa esey Gobierno a dicidi cu ta aumenta un impuesto special riba turistanan cu ta paga roomtax den hotel of timeshare pa Serlimar por haya miyones adicional pa aña, pero e ora procedente di e hotelnan. Pues e mesun compania ta haya subsidio di Giobierno caba di e placa di belasting di tur ciudadano y di otro banda ta haya un subsidio nobo for di turistanan tambe.
EcoTech tin algun siman caba ta splica cu di e forma aki, Gobierno ta forma un monopolio unico pa Serlimar, sacando EcoTech y otro companianan automaticamente for di mercado. Ningun hende lo bay paga casi dobel pa e mesun servicio. EcoTech ta boga pa tin un nivel husto di competencia, pa por competi riba servicio y eficiencia y no riba prijs, pio si Gobierno mes ta subsidia.
EcoTech ta existi desde aña 1985 caba, prome cu Serlimar mes y ta manehando 20% di e mercado di clientenan residencial y 90% di e mercado comercial y ta keda bira mas grandi danki na nos tremendo servicio y eficiencia.