Conseho di Minister siman pasa a tuma e decision final pa asina reunionnan di Conseho di Minister por bay completamente digital. Esaki ta e proyecto di e-Kabinet cu ta parti di e-Government. e-Kabinet ta un adelanto importante riba e tereno di innovacion, cu lo scapa tempo y placa.
Actualmente tin dos reunion di Ministerraad pa siman y cada Minister ta haya un map hopi diki cu documento. Pa prepara tur e documentonan ta tuma tempo y ta gasta hopi papel inkt.
Na momento cu bay over na e-Kabinet, e preparacion lo bay mas eficiente y cu menos gasto. E Ministernan tambe lo por repasa e documentonan mas lihe y e decisionnan por wordo tuma mas facilmente. E tempo di cada reunion lo wordo reduci. Cu e proceso aki ta resta mas tempo pa strategia y tuma otro desicionnan y dedica na e retonan grandi di nos pais.
“E meta di e-Government ta pa mehora calidad di bida. Pasobra e ser humano lo haya servicio mas lihe y asina lo tin hopi tempo ta sobra pa haci cosnan mas agradabel hunto cu famia. Pa Conseho di Minister e adelanto aki kiermen cu reunionnan por bay mas eficiente y tin mas tempo pa atende cu e retonan grandi di nos pais. Asina gabinete Wever-Croes ta pone e vision di innovacion den practica”, Prome Minister Evelyn Wever-Croes a duna di conoce.