Historia di e promé auto na Aruba
Promé cu nos cuminsa cu e historia di e auto clasico, lo ta bon pa duna un storia chikito y interesante di e promé auto cu a jega Aruba. Pa Aruba e yegada di e promé auto na aña 1915 mester tabata un milagro mes grandi cu tempo cu e indiannan a mira e Spañónan riba cabai pa promé biaha. E promé medio di transporte a jega Aruba na aña 1880 y na Papiamento tabata wordu jamá “Kitoki” of “Kitrin”. Kitoki tabata mas tanto usa den stad y Kitrin den mondi. Nan tabata un vehiculo chikito y lihé cu tabata wordu rancá pa un cabay. Den dos pa tres hora e Kitoki por a hiba bo di un bario pa otro. E tempo ey e no tabata pasa banda di costa pero tabata tuma e camindanan di paden esta, Dakota, Mahuma, Sabana Grandi y Rooi Frances. Ta wordu bisá cu ta solamente tres di e vehiculonan aki tabatin na Aruba, pa motibo cu e camindanan no tabata adecuado. Un tal señor Bake ta e nomber di e persona cu su tarea tabata pa dominá e cabainan, pa asina nan por a ranca e Kitoki. Den añanan 1910 bo por a cumpra un bon cabay pa Afls.150.00.
Na aña 1915 e promé auto a jega Aruba. Dr. George R. Hopkins tabata e promé persona cu a cumpra un auto di e marca Metz.
Den e tempo ey na Aruba no tabata bin barco grandi cu por a trece un auto completo te na tera. Pesey e auto a bin den pida pida hincá den algun caha cu instruccionnan con pa hinca e auto den otro. E Loods R. Johan Beaujon tabata esun cu a juda arma e auto den otro. A dura simannan promé cu nan a keda cla. Nan a warda te riba un Diadomingo mainta, ora cu misa catolico y protestant ta den, pa test e auto. Riba e caminda directo di Ponton pa Noord, sin ningun hende riba caminda, nan a siña maneha e auto cu solamente instruccion riba papel. “Tabata parce cu e auto lo spart for di otro”, asina señor Beaujon tabata bisa. Despues di algun hora nan por a core e auto y e Diadomingo merdia Oranjestad tabatin un tema papia riba dje, ora cu Dr. Hopkins y señor Beaujon a pasa cu e monster riba wielnan halto cu tabata saca huma.
E auto den Savaneta
Un storia interesante ta tempo cu Dokter Hopkins a traha na Savaneta. Banda di su cas, Anita Bisslick tabata hisa bandera masha halto tur Diahuebs mainta. E tabata un bandera blanco cu e letter “D” corra den dje. Si e bandera no ta na top, bo sa cu dokter no ta na Savaneta. Ora Dokter Hopkins tabata pasa cu su auto den Savaneta, tur e Savaneteronan por a admirá: “e wagen sin cabai”. Ora dokter tabata jegando, Ma Nica, cu a caba di saca awa for di pos, tabata canando cu bleke di awa riba su cabes. Ora el a tende pito di e auto, el a spanta cu e awa riba su cabes a cai riba dje. Asina el a jega cas papa-muhá. Otronan ta bisa cu Ma Nica a spanta asina hopi cu el a bai sconde te den lamá. E tirenan di e auto tabata masha smal. Julia Kock a mira “e wagen sin cabai” cu tabata pasa y el a bai investigá e rastronan cu e tirenan a laga atras. El a grita: “Esaki si ta un soldachi grandi.”
Poco mas despues e hendenan a cuminsa custumbrá cu e auto di dokter. Riba un dia, un homber a bai contra dokter banda di Bak’i Salo. El a para dokter pa papia tocante malesa di su señora. Papiando, el a mara su burico na defensa di e auto y dokter a bisé: “Wel, OK, subi numá, pa nos bai purá”. E homber a habri porta, bula paden y ta ora nan a yega su cas, el a corda riba e burico. Nan a haña e cabuja so….
E promé auto a causa tambe e promé accidente di trafico na Savaneta, pero no fatal y ni mucho serio. Auto di dokter a dal señor Nicolaas Kock, cu a ser transportá pa Playa den e auto di dokter mes.
E di dos auto, un Ford, a wordu cumprá door di Dokter H. E. Oduber y di tres tambe un Ford, a wordu cumprá for di Corsow, pa señor Segundo N. Ecury.
(Aki nos ta duna reconocimento na Dr. Johan Hartog 1980 “Aruba Zoals Het Was Zoals Het Werd”; y Pastoor G. Van Veen 1974 “Savaneta Antes y Awor”
