Ya ta un poco mas cu un siman cu nos a anuncia e hazaña historico y tan spera pa hopi tempo pa loke ta e rescate di e teatro di Ser’i Noka.
Masha hopi ta e personanan sumamente contento y entusiasma cu a tuma contacto cu Go Cultura Foundation no solamente pa haci nan donacion na e causa, pero cu tambe a haci nan mes disponibel pa brinda cualkier tipo di asistencia, sosten y apoyo. Esaki sigur ta algo di aprecia y elogia.
Organisacionnan local tambe a demostra hopi interes pa brinda apoyo financiero pa cu e esfuerzonan di rescate, restauracion y renobacion di loke por wordo considera como nos patrimonio nacional.
Varios compania ya caba a haci un promesa pa brinda nan apoyo valioso na e causa aki.
E companianan aki tambe a ricibi e asina yama “ambito di proyecto” y ta den deliberacion den nan seno pa dicidi cu cuanto fondo nan lo contribui cune.
Manera cu a wordo anuncia, “Go Cultura Foundation” a ricibi autorisacion for di Parokia di Santa Cruz pa cuminsa cu e trabaonan urgente di rescate, restauracion y renobacion di e teatro di Ser’i Noka, pa asina e teatro por haya su lugar prominente bek den nos comunidad.
Pastoor Jairo Maduro cu ta e persona na cabes di e Parokia, a mira e importancia di e rescate urgente aki y ta dunando tur su cooperacion y asistencia pa e meta por bira un realidad.
Proteccion di nos patrimonio nacional ta sumamente importante.
E anfiteatro aki lo sirbi como plataforma y estimulo pa nos sernan creativo por sigui desaroya y expone nan talento y den e proceso aki aporta na inspira y eleva nos comunidad, promove y stimula convivencia social, inclusion y diversidad. Varios ta e motibonan valido dicon e proteccion y uso continuo di e teatro aki lo tin hopi beneficio pa e desaroyo positivo di nos comunidad.
E trabaonan pa recauda fondo ta sigui, pero na mes momento pronto e trabaonan mes den e teatro lo cuminsa.
Nos sigur ta motiva y encurasha tur esnan cu tin e interes, pa apoya e esfuerzonan grandi aki.
Bishita e website www.gocultura.org pa mas informacion y detaye of por comunica cu Go Cultura na 5830808 pa participa y haci bo donacion.
Keda pendiente pa mas informacion y desaroyo di e rescate historico aki.
Ser’i Noka y Aruba ta conta cu nos apoyo y proteccion.