Siman a habri cu un reunion entre henter Conseho di Minister y Gobernador di Aruba den cual a atende varios punto di Gobernacion.
Premier Wever-Croes y su esposo a atende e celebracion di 70 aña di misa Santa Filomena na Paradera cu a inicia den un bunita Santo Sacrificio di misa y a termina cu bunita celebracion na Centro Caiquetio. Pabien y bendicion na henter pueblo di Paradera.
Dia 10 di September, e di 34 aña parlamentario a cuminsa. Tabata un bunita ceremonia pa celebra democracia. Den su discurso Gobernador a trece padilanti e desaroyonan den nos pais, e fundeshi fuerte di democracia. Tambe Gobernador a enfatisa e trayecto di integridad cu nos pais ta canando, sosteni pa metodonan innovativo den proceduranan di Gobierno pa garantisa mas transparencia. Un discurso realmente bon balansa, di unda nos ta bin, kico nos a logra, y unda nos ta bayendo como pais.
Premier Evelyn Wever-Croes a reuni siman pasa cu embahador di Reino na Caracas sr. Braakhuis y Premier Wever-Croes a haya un miho bista di e situacion na Venezuela, cu ta un situacion dificil. Pa nos na Aruba, esey ta e motibo principal pa mantene nos fronteranan cera.
Premier Wever-Croes hunto cu team Futura a reconoce Directora di Censo Sharine Luydens como Outstanding Innovator, pa tur su trabounan haci na Censo riba e tereno di innovacion, mehorando e servicio di Censo na comunidad. Sigur un ehempel kico comunidad por spera cu e-Government.
Premier Evelyn Wever-Croes a reuni cu e grupo di corectornan di Papiamento cu recientemente a lanta un fundacion. Ta bira tempo pa organisa un curso di corector di Papiamento atrobe, pa asina duna realse na nos idioma Papiamento. Tambe pa mehora e servicio di Gobierno na comunidad, pa a traves di e idioma materno por comunica mas efectivamente.
Premier Evelyn Wever-Croes a reuni cu representantenan di Hulanda na Aruba sr. Abrahams y na Corsou sr. Arkebout. Durante e reunion a toca e tema di e relacion den Reino, supervision financiero y e retonan cu pais Aruba ta enfrentando.
Premier Evelyn Wever-Croes hunto cu Minister di enseñansa a asisti na e apertura di aña academico di Universidad di Aruba. E aña academico aki ta cuminsa e facultad nobo di SISSTEM, e facultad di materianan tecnico, cu lo prepara nos propio hobennan pa futuro. Durante su discurso di despedida prof. Elzinga cu tabata traha na Universidad di Aruba pa e ultimo 30 añanan, a elabora riba e beneficionan cu tin na arubianisa nos sistema di ley. Beneficionan practico y beneficionan financiero. Nos ta desea prof. Elzinga tur cos bon.
Siman a finalisa cu e show di moda historico di Ronchi de Cuba celebrando 30 aña den moda. Durante e añanan aki ta hopi hende a haya oportunidadnan unico, y asina a hiba nomber di Aruba riba tarima internacional. Pabien Ronchi. Presente na e ocasion aki tabata ademas di Premier Evelyn Wever-Croes, Minister Xiomara Ruiz-Maduro, Minister Otmar Oduber, Minister Dangui Oduber y Minister Rudy Lampe.
Na ocasion di apertura di e aña nobo Parlamentario, durante Sr. Gobernador su discurso un biaha mas e apoyo na Crisisplan Social a keda expresa. E ser humano ta prioridad y central pa Gabinete Wever-Croes.
Desde 16 di augustus cu Tra’i Merdia ta resorta bou di Ministerio di Asunto Social y Labor, reunionnan preparatorio y orientativo a bin ta tuma luga entre Oficina di Minister, Departamento di Recurso Humano, Direccion di Finansas y Bureau Tra’i Merdia. Meta ta pa e traspaso bay ordena y pone Tra’i Merdia bek den su estado original. Tin 1050 mucha atendiendo Tra’i Merdia y 350+ mucha riba lista di espera. Indicativo cu Tra’i Merdia ta un necesidad y di gran balor pa Minister Glenbert Croes.
Minister Glenbert Croes tabatin reunion cu Bureau Sostenemi. Durante e reunion aki a pone e mandatario na altura di locual awor ta prioridad pa e departamento aki. En especial si tene den consideracion cu desde 1 di juni 2019 e departamento aki a bira e Meldpunt nacional pa tur caso di abuso y negligencia.
Minister Glenbert Croes conhuntamente cu Ministernan Dangui y Otmar Oduber tabatin un reunion cu Gerencia di RIU, un di e hotelnan prominente aki na Aruba. Meta di e reunion tabata pa concretisa e contribucion di Hotel Riu na causanan social.
Orientando su mes riba tur aspecto, Minister Glenbert Croes a reuni cu Tra’i Merdia Sonrisa, cu ta e Tra’i Merdia pa nos muchanan special. Durante e reunion cu Directiva di Sonrisa, e mandatario a expresa su apoyo na e Tra’i Merdia aki.
Tabata pa Minister Glenbert Croes un honor di por tabata presente na e celebracion Spantenbier di Cas Sjabururi. E cas aki a ser expande cu 6 camber mas unda cu nos hendenan special ta keda biba riba nan mes pero internamente y bou guia di Cas Sjabururi.
Minister Glenbert Croes a duna honor y reconocimento cu palabra di gratitud na Sr. Danilo de Freitas cu a dedica 40 aña di su bida na aviacion di Aruba.
Dialuna Minister di Husticia mr. Andin Bikker a ricibi un delegacion di Dienst Terugkeer en Vertrek di Hulanda den cuadro di asistencia a base di e fondonan cu Gobierno Hulandes a pone disponibel pa refuerso di nos fronteranan. Diamars mainta e delegacion di Dienst Terugkeer en Verkeer a tene un tayer di inspiracion pa introduci y elabora mas riba e topico di Hostmanship. Aruba a haya 12 cupo pa trainernan local prepara nan mes pa facilita e curso di Hostmanship. E tayer ta resorta bou di Ministerio di Husticia, Siguridad y Integracion, departamentonan manera IASA, Guarda nos Costa, DIMAS, Cuerpo Policial y KIA ta bin na remarca pa training.
Diaranson mainta Minister a tene reunion cu Sindicato di Polis SPA, Korpsleiding y representantenan di recherche y a yega na un plan pa un solucion pa un facilidad nobo pa entre otro e rechercheafdeling, despues cu haci cierto adaptacion di siguridad. Actualmente ta drechando un edificio na Wayaca unda cu pronto varios departamento di Polis lo wordo ubica.
Diabierna atardi Minister Bikker a reuni cu representante di VNO, sr. Erwin Arkenbout caminda cu a trata varios tema di cooperacion den Reino riba tereno di Husticia.
Diasabra mainta 14 di September Minister Bikker tabata na aeropuerto Internacional Reina Beatrix pa desea grupo 8 di Cuerpo di Bombero un bon y exitoso biahe pa Jacksonville Florida caminda nan ta bay pa haya training. E training aki ta pa certificacion y haya mas experticio con pa responde si un calamidad presenta su mes.
Minister encarga cu turismo a anuncia cu turismo ta sigui crece y desaroya na un manera sumamente positivo. Resultado di hotelnan den augustus ta indica otro luna record pa nos turismo. Grado di ocupacion a subi den luna Augustus cu 5.2% compara cu mesun luna aña pasa. E grado di occupation ta 87%.
E REVPAR den luna augustus 2019 a crece cu 11.7% y a yega $207.18. E REVPAR ta un di indicadornan mas importante pa midi calidad di turistanan. Nos ta den top 4 paisnan den Caribe cu e REVPAR mas halto. Banda di esaki e average daily rate tambe a aumenta cu 5% y ta na $238.05. Sigur un otro luna hopi exitoso pa nos turismo danki na esfuersonan di tur cu ta labora den e industria aki.
Diaranson atardi Minister di Turismo Sr. Dangui Oduber tabata presente na e edificio di ex Aqua Condominiums caminda e mandatario a haya un presentacion di e proyecto di Radisson Blu. Despues e mandatario a firma un carta di compromiso den nomber di Gobierno conhunto cu Beachside Development Company y Radisson Hotels International. E proyecto hotelero aki a cuminsa na aña 2007 y a encontra hopi dificultad na caminda y a keda para pa hop aña. Danki na e confiansa den nos economia y den Gabinete Wever-Croes, Sr. Venancio Gonzalez a cumpra e propiedad aki. Despues di esaki na aña 2018 e inversionista a acerca Radisson Hotels International cu e idea pa desaroya y converti e proyecto aki den un Radisson Blu Hotel. Radisson Blu Hotel ta marca sumamente prestigioso, un proyecto grandi cu un inversion di mas o menos 80 miyon dollar cual lo tin un impacto sumamente positivo pa Aruba su economia.
Diahuebs anochi Minister di Deporte sr. Dangui Oduber a bishita na Sport Club United na Noord pa duna e club e bon noticia cu pronto e veld lo haya lusnan LED. Veld di United no tin iluminacion p’esei esaki ta sumamente necesario. Pa realisa e iluminacion, veld di United lo bay conoce trabounan di infrastructura riba e parti di electricidad prome y despues lo instala e lusnan.
Minister encarga cu Infrastructura a informa cu Gobierno ta reconfirma cu no lo subi tarifa pa recoge sushi cu 210 florin, e tarifa ta keda 25 florin pa luna! Considerando e gran cantidad di informacion incorecto cu tin pa loke ta tarifa di recogemento y maneho di desperdicio, Gobierno ta aclaria cu den e ley di Serlimar cu ta na Parlamento, no tin un aumento di prijs. E tarifa di 25 florin ta e mesun prijs cu a yega na acuerdo a base di diferente dialogo cu sindicatonan, pensionadonan, Parlamento y Gobierno.
Siman pasa DIP a reacciona den caso di e tereno na Alto Vista. ‘Ni DIP ni Gobierno actual a kita tereno for di ningun hende, e ta kita caba desde 2016’, a splica cu e tereno huurgrond en cuestion a wordo kita na 2016 door di ex Minister Benny Sevinger. Ora cu a kita e tereno lo a manda un carta pa e persona indicando cu a kita e tereno, e carta aki tabata firma pa e director di DIP e tempo ey. Esaki ta significa cu desde 2016 no ta permiti tin actividad riba e tereno cu ta proteha como area di naturalesa.
DOW y DIP a forma un aliansa pa combati construccionnan ilegal na Aruba. Importante pa tene cuenta cu lo siguiente: Ta depende e indole di e construccion di e luga manera si ta trata di mal uzo di e tereno, mal uzo di propiedad di Gobierno, of si a traha/construi algo ilegal. E trabounan di control pa locual ta construccion ilegal y mal uzo di propiedad di Gobierno ta bay keda continua den bon cooperacion cu e departamentonan pa percura cu ta sigui un liña corecto.
Diahuebs mainta, Minister Otmar Oduber a ricibi e manifiesto di Serlimar dunando respet na e grupo di trahadonan y e trabou enorme cu e compania a bin ta haci. Serlimar como Sui Generis tin un tarea cu Gobierno a encarga pa percura pa limpiesa di Aruba, maneho di desperdicio y pa recogemento di desperdicio rond Aruba. A pidi comprension y duna siguransa na cada empleado, cu Gobierno lo keda para tras di Serlimar cu e ley cu tin na Parlamento. Aruba mester un solucion duradero pa atende cu e problema di maneho di desperdicio cual ta netamente locual Gobierno ta trahando riba dje.
Siman pasa a habri cu e noticia di e prome fruto di acuerdo cu Minister di Enseñansa a firma pa loke ta cooperacion entre EPI cu HOH. Un grupo di graduadonan di EPI como enfermero a haya un extra atencion door cu nan training a tuma luga practicamente na pia di trabao na HOH. Tanto HOH como EPI ta contento cu e resultado y tur graduado a haya trabao di biaha den nan ramo.
Minister di Enseñansa a realisa e apertura di e aña academico 2019-2020 di Universidad di Aruba, den presencia di Minister President, unda a despedi di Prof. Elzinga y por a cera conosi cu e miembronan nobo di e College van Curatoren.
A cera e siman cu presencia di Minister di Enseñansa na entrega di Clint Whitfield Outstanding Award 2019 na alumnonan di Colegio Arubano door di Kiwanis Club.
Minister Ruiz-Maduro a celebra Dia di Boneiro hunto cu e comunidad Boneriano, diadomingo dia 8 di september na Bonaire Bar na San Nicolas. E mandatario a hiba palabra na e apertura y a conta un tiki di e historia y aporte di famianan Boneriano na Pais Aruba. Tambe a gradici sr. Jaime Emerenciana di 93 aña cu a comparti cu tur esnan presente e historia di Club Boneriano y di e comunidad Boneriano residencia na Aruba. Minister Ruiz-Maduro a pasa un rato ameno yena cu musica di tipico y baile. E dignatario a yama e comunidad Boneriano na Aruba masha danki pa nan aporte na Pais Aruba.
Diadomingo ultimo Minister Ruiz-Maduro tabata presente na e Santo Sacrificio di Misa y celebracion di e 70 aniversario di Misa di Parokia di Paradera. E dignatario a hiba palabra y a felicita Pastoor y e Parokianonan cu e bunita celebracion cordando tur presente riba e mensahe di Apostel Pablo na e creyentenan di Asia Menor, ‘Haci tur cos di henter boso curason, como si fuera pa Señor boso ta traha y no pa hende. Corda cu e ora ey Señor lo recompensa boso cu e beneficionan cu E tin warda pa su Pueblo. Pasobra boso ta den servicio di Cristo cu ta boso doño.’
Diamars dia 10 di september Minister Ruiz-Maduro a atende e apertura di aña parlamentario. Gobernador sr. Alfonso Boekhoudt a tene un discurso elocuente y a subraya cu un di e prioridadnan di Gobierno ta pa yega na un finansa publico sostenibel y duradero y a elabora riba e maneho economico integral 2019-2021 y e seis sectornan prometedor. Riba parti di cultura su Excelencia a menciona pa sigui reconoce e baluartenan cultural. Alabes Gobernador a papia riba e situacion social y medio ambiente di Pais Aruba. Gobernador sr. Boekhoudt a subraya cu tabatin cambionan positivo den e dos añanan aki na Pais Aruba.
Durante conferencia di prensa Minister Ruiz-Maduro a brinda informacion tocante di e accion di Aduana y tambe e resultado di e caso sumario contra e sindicato SADA pa para e accionnan cu ta perhudica economia di Aruba. E mandatario a splica cu Gobierno no por cumpli integralmente cu e convenio salarial pero ta bay di acuerdo pa duna tur Aduanero un total di Afl. 175,- (Afl. 150 + Afl.25) na periodiek y a haci e liña di carera mas cortico. E dignatario a informa cu Gobierno tin cu tene na cuenta e consehonan negativo di Organo Consultivo (Raad van Advies), Departamento di Recurso Humano y Departamento Legislativo cu ta mustra riba e peliger di presedencia y e gastonan halto di personal cu esaki por trece cu ne si Gobierno cumpli cabalmente cu e convenio. E presedencia aki lo por costa entre 50 pa 60 miyon na gasto extra di personal. Mirando e situacion financiero precario di Pais Aruba y teniendo na cuenta cu tin un protocol cera cu Hulanda, den cual mester baha gastonan di personal, Gobierno no por djies cera wowo pa e consehonan negativo y cumpli cu e convenio di Aduana integralmente.
Den e veredicto hues a instrui e Aduaneronan reanuda trabou entrante 6or di mainta e siguiente dia mes y a duna un ‘cooling off period’ di 30 dia durante cual SADA tampoco no tin mag di bini cu ningun otro tipo di manisfestacion. Gobierno por medio di Departamento di Recurso Humano lo bay haci un presentacion na e Cuerpo di Aduana en general di e beneficionan cu Gobierno a duna e Aduaneronan a base di e convenio. Di e manera aki tur Aduanero por wordo bon informa di e partinan di e convenio cu Gobierno ta cumpli cune y asina tur Aduanero por ripara cu nan no a keda man bashi of wordo perhudica.