“Apesar di situacion financiero, Gobierno ta tuma pasonan serio pa haci inversionnan den enseñansa”
Diabierna atardi, Prome Minister Evelyn Wever-Croes a ricibi e manifesto di un grupo di maestro cu a presenta na Bestuurskantoor. Prome Minister a expresa cu e vocero di maestronan, na forma respetuoso, a trece padilanti e preocupacionnan di e maestronan cu algun desaroyo di enseñansa y a haci e peticion pa no corta den enseñansa.
“Mi a splik’e cu e situacion financiero cu nos a hereda a pone cu mester a tuma pasonan serio pa drecha e situacion pa despues haci e inversionnan necesario den enseñansa. Ohala cu nos a haya e pais den miho circumstancianan, lo nos a inverti den enseñansa manera mester ta. Nos a palabra cu mi lo invite hunto cu un delegacion mas chikito, pa delibera riba e diferente puntonan. Mi ta sigur cu den dialogo, nos por sali afo”, Prome Minister a duna di conoce.
Prome Minister a indica cu e maestronan a bin trece nan preocupacionnan na Gobierno y esey ta nan derecho y no necesariamente lo tawata un accion politico.
“Mi ta aprecia e forma con nos maestronan ta lucha pa enseñansa y mi ta contento cu nan tin e oportunidad pa trece nan preocupacionnan sin cu nan ta wordo menasa cu riot commando.
Despues cu mi a lesa e manifesto den tur trankilidad, mi por a conclui cu nan a vocifera nan puntonan zakelijk y bon. Mi ta aprecie esey”, Prome Minister a enfatisa.
E mandatario principal di nos pais a enfatisa cu e ta tuma e preocupacionnan di e maestronan hopi na serio. “Como mama, mi tin un respet grandi pa tur maestro cu ta yuda nos educa nos yiunan. Kico cu mi por haci pa yuda den enseñansa, mi lo haci’e”.
Prome Minister a indica cu e realidad financiero di nos pais ta serio y cu mester tene cuenta cu n’e. Esaki, segun Prome Minister no tin un “easy way out” di e herencia financiero di gobierno anterior. Sinembargo, e bon noticia ta cu tin un “way out” si y Gobierno ta trahando riba esaki. Pa saca Aruba di e problemanan financiero y duna enseñansa e inversion cu e merece. Apesar di e situacion financiero, Aruba ta invirtiendo 5.7% di nos GDP na enseñansa. 17% di presupuesto di pais Aruba ta bay na enseñansa.
“Y nos meta ta pa, pa unabes nos sali di e crisis financiero, inverti mas den enseñansa, den e maestronan y den innovacion den enseñansa”, Prome Minister a duna di conoce.
Prome Minister a indica cu ya varios di e puntonan cu a wordo treci dilanti, a wordo atendi caba. Algo por ta a bay robes den e comunicacion entre e grupo di maestro aki y Prome Minister sinembargo mayoria tema di e cartanan di diferente grupo cu a wordo entrega ya a haya atencion. Prome Minister a ricibi carta di SPO cu a wordo atendi y soluciona, y nan a wordo informa. A ricibi carta di Tra’i Merdia cu a wordo atendi y ta casi full soluciona y esnan concerni a wordo informa. A ricibi carta di MDC y decisionnan necesario a wordo tuma, y awor ta den proceso di wordo ehecuta. Aki tambe esnan concerni a wordo informa caba.
“Pues nos ta trahando pa atende cu e preocupacionnan den enseñansa y lo duna e maestronan e atencion debido. Na final di dia, mi ta hopi contento di mira cu e cultura di miedo a cuminsa desaparece den nos pais, cu hendenan ta sinti nan liber pa manifesta nan malcontento, y cu nan por haci esaki sin wordo menasa, of agredi pa riot commando y pa cacho cua ta un situacion full contrario bou di e gobierno anterior”, Prome Minister Evelyn Wever-Croes a termina ta bisa.