Seguridad di e trahador y clientenan ta vital
ORANJESTAD, Aruba: ABC Tours & Attractions ta tene na cuenta e importancia pa cu e seguridad di nan empleadonan y tambe nan clientenan.
Pesey durante henter aña nan ta organiza conhuntamente cu Cruz Cora di Aruba diferente curso manera EHBO y curso di CPR pa asina tur nan Tour guide & Drivernan por aplica di e mihor manera nan conocemento na momento cu esaki ta rekeri, por ehempel ora di un emergencia y cu nan mester duna Prome Auxilio.
Esaki ta algo sumamente importante mirando cu na mas cu un ocasion nan ta haya nan mes confronta cu diferente caso caminda door di e coriente fuerte di lama, nan mester asisti algun persona cu nan tecnicanan prome auxilio.
Gerencia di ABC Tours & Attractions bao guia di Marvin Kelly ta di opinion cu cierto cursonan asina ta hopi importante pa e empleadonan y ta zorg pa tur empleado, specialmente e Tour guidenan y e Drivernan keda actualiza cada pasa 2 aña pa nan por refresh e conocimento relaciona cu e cursonan aki.
Adhunto algun potret di e empleadonan durante e cursonan di EHBO y CPR na di e edificio di Rode Kruis.