ORANJESTAD – Citando varios ehempel di proyecto y logronan alcansa pa
Partido di Pueblo Arubano AVP cada bes cu tabatin e honor di tabata na
mando di Pais Aruba, Muzannin Wever a sa di ilustra di un forma hopi
cla, pakico e filosofia di e partido di semper scucha pueblo y planea
segun nan necesidad, a percura pa e progreso cu nos pais a conoce
durante diferente decada.
Wever, kende ta yiu muhe di ex Minister y ex Parlamentario Mary
Wever-Lacle, ta papia di experiencia ora ta bisa cu den añanan 80,
prome cu Status Aparte, AVP a traha plannan cu mes ora a wordo ehecuta
ora AVP a drenta gobierno. Den apenas tres aña AVP a saca Aruba for di
e crisis di seramento di e refineria y medidanan di e partido MEP.
Fuera di esey, AVP a crea un economia di turismo nobo y amplio cu a
duna trabou na e miles di hende cu a keda sin trabou. AVP a elimina e
medidanan di MEP, a habri scolnan cu MEP a sera y crea posibilidad pa
tur hoben bay studia, en bes di un grupito cu tabata wordo selecta a
base di color politico. “Ta pasobra AVP tabata sa kico pueblo tabata
kier y AVP tabata prepara pa traha mes ora, cu por a haci asina hopi
pa Aruba y pa pueblo den asina poco tempo!” Wever a indica, ricibiendo
apoyo di e publico den Renaissance Conferente Center.
E activista y miembro di partido AVP a sigui elabora con na aña 1994,
despues di 5 aña di gobernacion cu a lubida riba Pueblo y a sirbi
amigo y famianan so, AVP por a drenta gobierno y redobla e pensioen di
behez, atende cu e falta enorme di vivienda y e cantidad di hendenan
cu tabata biba den trailer, renoba scolnan y debolbe forsa di compra
na trahadornan.
“Ta door di scucha pueblo y traha plannan basa riba necesidad y anhelo
di pueblo, cu AVP por a introduci AVZ pa asina sigura tur hende na
Aruba cuido medico di calidad igual como un derecho humano y sin cu
pueblo mester pidi ningun politico e fabor di haya cuido medico!”
Di mesun manera, esta door di scucha y planea pa cumpli cu
necesidadnan di pueblo, na 2009 AVP por a drenta gobierno pa reforsa
forsa di compra di trahado y pensionadonan despues di atrobe 8 aña di
medida di MEP; door di scucha pueblo y prepara, cu AVP a lanta
economia y crea trabou despues di añanan di negligencia di nos
economia.
Asina a drecha scol y edificionan di pueblo cu a keda na ruina door di
negligencia di MEP; asina a renoba nos infrastructura, construi un waf
nobo, renoba e hospital di Aruba, crea un infrastructura di camindanan
nobo pa stimula economia y crea posibilidadnan nobo pa economia di
Aruba; y tambe a haci nos menos dependiente di petroleo stimulando
desaroyo di energia renovabel na nos pais.
“Ta esaki ta loke partido AVP ta nifica pa Aruba y pa nos hendenan.
Esaki ta e motibo pakico ta bon pa ta un activista di partido AVP:
Directamente nos como activista ta traha pa nos pais y nos pueblo, pa
medio di partido AVP,” Wever a bisa cu determinacion, generando un
entusiasmo enorme den henter e sala.