Partido AVP cu grato placer ta anuncia cu e masha popular ex Premier di Antiyas sra. Maria Liberia-Peters ta bay ta invitado di honor durante e ‘Encuentro Voluntarionan 2019, un causa comun’ na Renaissance Convention Center dia 1 di september benidero.
Sra. Liberia-Peters pa hopi aña a milita activamente den partido Nacional cu ta partido ruman di partido AVP. Na añanan 70 Liberia-Peters a drenta arena politico pasobra como maestra el a haya cu e unico forma pa haci cambionan concreto tabata pa medio di politica. E tabata Prome Minister di Antiyas durante añanan 1984-1986 y despues di 1988 te cu 1994. Tambe el a ocupa e puesto di Miembro di Staten y tabata Minister di Asuntonan Economico.
Pa partido AVP cu semper a mantene lazonan estrecho cu tanto Matria Liberia-Peters como partido Nacional, ta un honor grandi di por tin e persona di gran taya aki, un persona respeta den e mundo politico, pa ta parti di su encuentro como orador. Sin duda su presencia ta duna un extra cachet na e mainta aki cu ta cuminsa for di 9or. Tur hende ta bon bini.