Brasil a dicidi di rechasa asistencia brinda pa e organisacion internacional, G7. E pais a wordo ofreci 22 miyon dollar pa yuda combati a candela cu ta destrosando e selva di Amazonia.
Presidente Jair Bolsonaro a declara siman pasa cu no tin e fondonan pa combati e candela aki. Apesar di supuestamente no tin e fondonan, momento cu Brasil a wordo ofreci e suma aki for di e 7 paisnan : Estados Unidos, Reino Uni, Japon, Italia, Alemania, Francia y Canada, e a scohe pa rechasa e ayudo.
Sigur un decision impopular y cuestionabel di parti e presidente Brasilero. E presidente ta di e punto di bista cu e ayudo stranhero aki pa yuda salba e selva Amazonico for di destruccion total ta un atake contra e soberania di Brasil. Bolsonario a splica cu e no kier Brasil wordo trata na e mesun forma cu un ‘colonia’.
Un vocero di e gobierno Brasilero, Onyx Lorenzoni, a ataca e presidente Frances cu a ofrece e ayudo aki bisando cu “Macron no por a ni evita un candela na locual ta un patrimonio mundial, y e kier mustra nos kico ta (bon) pa nos pais? E tin hopi pa cuida na su mes cas y e colonianan Frances.” Lorenzoni a bisa esaki referiendo na e candela di e catedral di Notre Dame.
E Amazonia ta un area mas grandi cu henter Europa. E ayudo financiero lo a bay na yuda combati e candela aki treciendo mas avion specialisa cu tin e equipo pa combati candela y tambe lo a yuda reinforsa e operacion militar actual.
Por deduci cu e decision di presidente Bolsonaro pa rechasa e ayudo importante aki ta uno cu ta demostra su falta di compromiso pa cu e Amazonia. E presidente derechista y conservativo den su poco tempo den gobierno a introduci leynan cu ta haci e selva vulnerabel pa locual ta construccion (y destruccion).