Den cuadro di Sociaal Crisisplan (SCP), Minister di Asuntonan Social y Labor, Minister Glenbert Croes a haci entrega di e di dos raportahe di SCP na Gobierno y Parlamento di Aruba. E raportahe aki ta segun e ley di e fondo presupuestario pa e programa social financiero y asina tur instancia involvi den SCP mester responsabilisa e fondonan cu ta ser inverti y e desaroyo di e diferente proyectonan. Sociaal Crisisplan ta conta cu participacion di diferente sector gubernamental incluyendo social, husticia, salubridad y enseñansa. Alaves, tin participacion di fundacionnan cu ta traha pa atende cu e retonan sociaal cu Aruba ta confrontando den un forma preventivo, ayudo trempan y curativo di crisis agudo.
E di dos raportahe a indica un mehoracion compara cu e prome raportahe presenta na fin di januari e aña aki. 93% di e proyectonan ta canando di manera satisfactorio te cu juli. Tin 31 proyecto cu ta den ehecucion manera por ehempel e training di e diferente sectornan pa loke ta e metodo di trabou social “Signs of Safey” y tambe e proyecto di Jongerenloket, unda Departamento di Asunto Social y partners ta ofrece cursonan y guia na mas di 20 mama soltera pa yudanan subi mercado laboral y asina sali di e sistema social. Diferente fundacionnan social tambe ta forma parti di Sociaal Crisisplan y ta ehucutando proyectonan specifico.
Meta di SCP ta pa limita e risiconan cu por tin pa tur mucha y hoben na Aruba. Alaves kier maximalisa tur e factornan di proteccion pa asina tur mucha y hoben por crece den un ambiente sigur y por desaroya nan mes positivamente mas tanto posibel. SCP tambe kier brinda tur mucha y hoben cu por a bay den un caminda negativo, un di dos posibilidad pa hiba un bida sano y productivo.
Tur mucha y hoben mester por sinti nan mes sigur na Aruba. Ta trahando na un child protective system pa cu esaki. Adicionalmente, ta trahando pa elimina retonan social di mucha, hoben y nan famia. Di es manera aki ta traha na preveni casonan lamentabel den nos comunidad.
Minister Glenbert Croes actualmente ta na Hulanda atendiendo reunionnan cu varios ministerionan y departamentonan gubernamental compartiendo diferente informacion referente e crisis social y con ta trahando pa atende y alivia e situacionnan aki.