Dianan 19 y 20 di augustus 2019 un biaha mas Gobierno completo tabata den Parlamento pa raporta kico tur a tuma lugar den e prome 6 lunanan di 2019. Den liñanan grandi Gobierno a indica kico tur a keda cristalisa caba, kico ta tumando lugar actualmente y kico tin den tapara.
Alabes mediante e uitvoeringsrapportage di kwartaal 1 y 2 di 2019 cu Parlamento a ricibi recientemente, den liñanan grandi Gobierno a presenta e cifranan pa loke ta trata entrada y gastonan pero tambe a duna informacion encuanto e uitputtingspercentages general di gobierno den su totalidad relata na presupuesto 2019. Sigur e cifranan presenta ta refleha e maneho responsabel cu Gabinete Wever-Croes a bin ta hibando y nos por mira claramente un mehoracion den e resultado compara cu e mesun periodo aki aña pasa.
Loke sigur a resalta ta e retonan grandi cu Gobierno tin cu ta obstaculisa ehecucion di nan maneho y cu ta limita creacion di maneho nobo of cu ta impedi inversionnan asina necesario pa nos pais por keda realisa.
P’esey e reunion tabata uno hopi importante pasobra Gobierno a bin pa informa Parlamento con nan ta atendiendo of ta bay sigui atende cu e diferente retonan cu nos pais tin actualmente.
Durante e reunion Parlamentario Tromp-Lee a enfatisa cu pueblo kier mira nan cartera rende fin di luna, pa nan por cumpli cu nan debernan, percura pa nan famia y toch resta algo pa recrea y por pasa tempo di calidad cu nan famia. P’esey mes Tromp-Lee a haya necesario pa haci un apelacion grandi na gobierno pa no obstante e consehonan exigente y persistente, pa semper pone e ser humano central y realisa cu ta te cierto grado por sigui cobra pueblo e debe cu Mike Eman cu orguyo a crea.
Segun Tromp-Lee e ta haya incomprendibel con esnan cu mester a controla y supervisa y mas importante mester a actua pa preveni e desaster financiero ocasiona, ta esnan cu awe kier impone exigencianan devastador pa nos pueblo.