Meiveld: Diaranson den oranan di mainta presencia di polis a wordo pidi na un cas na Meiveld, pa un caso di ladronicia di un celular.
Na yegada nan ta topa cu homber, kende a splicanan cu ela staciona su auto dilanti di un cas caminda ela bay haci e piscina limpi, ela laga su celular den e auto y despues di algun minuut cu ela bay bek den su auto, ela ripara cu su cellular no tey mas.
Na e cas tabata tin camara di seguridad y mesora nan a bay check e grabacion y nan a mira e cliente di SAMBA Randall W. mientras e tabata canando bayendo SAMBA a pasa banda di e auto, ela mira e celular den e auto y no por a resisti e tentacion y a hinca su man den e auto y a bay cu e celular. Randall a sigui cana bay direccion di SAMBA caminda elo mester a bay atende un curso di rehabilitacion.
Polisnan a mira riba e grabacion di e camara di seguridad, caminda un homber bisti cu flanel di strepi ta cana pasa y despues ta hinca man den e auto y ta coy e celular.
E agentenan na e sitio a dicidi di consulta cu nan superiornan pa mira si e grabacion por wordo considera “op heterdaad”. Asina cu nan a haya e confirmacion di nan superiornan, nan a bay SAMBA y a detene e homber Randall W. y mesora a pidi pa presencia di transportwagen di polis. E agentenan no a hay’e cu e celular riba dje, pero mas sigur elo por a sconde un caminda den e Centro di Rehabilitacion aki.
Randall tabata tin un tas cune y esaki a keda confisca pa autoridad. E homber cu ta doño di e celular a dicidi di entrega un keho oficial, e caso ta bou investigacion.