________________________________________________________________________
WILLEMSTAD, CURAÇAO – Tumando nota di e último notisia riba e plantashi deskubrí, e polítiko Gwendell Mercelina, Jr. ta di opinion ku mester yega na leinan ku ta yuda nos pais progresá for di e krísis aki, kuminsando ku dekriminalisá kanabis.
Un pais ku ta kere den desaroyo i ta grita pa un forsa ekonómiko nobo, den nos posishon benefisioso den Reino mester kuminsá orientá posibilidatnan pa desaroyá e potensial multi-bionario di e industria di kanabis mundial (medisinal i rekreashonal regulá).
Eliminashon di delito di posishon o plantashon di kanabis/mariwana, a ser probá den rapòrt di lidernan honorario mundial (èks-Presidente di Brazil Fernando Cardoso, èks-Presidente di Colombia César Gavira, èks-Presidente di Mexico Ernesto Zedillo i èks-shèf di Nashonnan Uní Kofi Annan) den e Komishon Internashonal di Polítika di Droga komienso di dékada na Nashonnan Uní ta yuda na frena violensia relashoná ku droga, yuda kombatimentu di enfermedatnan króniko i tambe problemanan sosial.
Aktualmente nos gobernashon ta propaganda e direkshon di insentivá agrikultura komo un pilar importante, i alabes tin e intenshon p’e direkshon pa enkaminá e proseso di maneho mariwana medisinal. Promé ku esei sosedé Mercelina kende ta boga pa nos ta e promé legisladó di kanabis medisinal i rekreashonal regulá ofisial den Reino Hulandes i Karibe (estilo estado California di Merka, paisnan Portugal i Canada) ta analisá ku mester kuminsá na tuma e promé stap pa stòp di kriminalisá, marginalisá i stigmatisá usuarionan i kultivashon di droga sòft ku no ta hasi daño na niun hende. Na lugá di kore tras di ‘kruimel-dieven’ segun lei penal, hustisia mester enfoká i prepará pa gara e ‘boef’-nan mes di nos estado.
Tomo di inisiativa kreativo sigur ta algu ku mester tuma lugá den nos pais, pa asina desaroyá i sali for di e krísis aktual ku nos tin. Paso tantu bal nos risibí medida o ayudo riba nos situashon finansiero den un forma sporádiko sin tin kambio di e mentalidat di esnan riba e posishonnan klave.
Gobièrnu di turno mester eksperimentá mas ku legalisashon di kanabis kual tambe ta kibra e forsa di krímen organisá, i promové/eduká riba salubridat i seguridat di nos suidadanonan.
Gwendell Mercelina, Jr.