Minister Dangui Oduber Investigacion forensico lo cuminsa na LAB di Hospital!

Manera a bira conoci di e posibel caso di fraude na e laboratorio na hospital, minister Dangui Oduber a tuma accion di inmediato. Un carta di caracter di urgencia e ser manda pa e hunta di supervision di hopsital cu e instruccion pa cuminsa di inmediato cu un investigacion forensico pa asina por determina si e acusacionan cu a wordo haci tin base y por wordo prueba. Minister Oduber ta satisfecho cu e hunta di supervision a atende e caso aki cu tur seriedad cu e mester wordo atendi. Pa minister Oduber lo ta inaceptabel pa haci negoshi cu salud di hende. E acusacionnan ta hopi serio y grave.
E minister a duna di conoce cu e investigacion lo wordo haci pa un compania di Corsou cu lo ta uno completamente independiente.
Minister Oduber y e directiva ambos ta mira e seriedad di e caso aki. E mandatario ta di pensamento cu esnan cu mester wordo teni responsabel ta esnan culpabel di e posibel fraude aki. E investigacion lo mester determina kende ta esnan responsabel y esakinan lo mester paga pa esaki.
E minister ta expresa: “mi ta satisfecho cu e investigacion aki lo cuminsa y esaki mester ta un les tambe pa tur cu kier trata na haci negoshi cu salud di hende”. E investigacion mes lo dura algun siman segun e mandatario.
Finalmente e mandatario a expresa cu ainda e no kier anticipa riba e resultado, pasobra awor e investigacion lo bai cuminsa pero si e mandatario kier a pone enfasis riba e hecho cu si wordo prueba loke ta ser bisa, lo tin consecuencianan serio.