E homber cu problema serio mentalmente Sean R. L. M. (31), Diaranson anochi siman pasa, e tabata razo y a hisa su bisiña Kiran M.R. (43)y a trata na bente for di e di dos piso di e compleho di apartamento caminda nan ta bibando. Afortunadamente e bisiña a logra scapa di e intento di asesinato aki.
Piedra Plat: Diaranson siman pasa den oranan di anochi, presencia di polis ta wordo pidi cu urgencia na un compleho di apartamento na Piedra Plat, despues cu un persona a trata na pone fin na bida di su bisiña.
Tabata Diaranson anochi algo prome cu 8’or, cu e victima Kiran M.R. a yega su cas y manera custumber ta staciona su auto dilanti di e compleho di apartamento, su apartamento ta keda riba e di dos piso, na momento cu ela bay subi e trapi, ela mira cu full ariba na e trapi su bisiña Sean para, mesora ela nota cu su bisiña tabata mustra basta agresivo.
Kiran a subi e trapi y a pasa banda di dje, te hasta a bise bon nochi. Pa su sorpresa Sean a gar’e na su schouder y memey su pia, dje ela hise na halto y a pushe na e rand di e balcon di e di dos piso, cu e intencion di benta Kiran over di e rand di balcon. Kiran a spanta y mesora a tene na un pilar pa asina evita cu e lo por wordo benta for di e di dos piso.
Kiran a cuminsa grita puntrando Sean pakiko e ta haciendo esaki cune, Sean tabata hopi razo. E mama di Sean a tende e gritamento mesora a core sali pafo. E mama a papia algo cu su yiu y asina e la laga Kiran los. Mesora e mama a hiba Sean paden y Kiran tur spanta, despues di a scapa di un morto cruel, a core drenta den su apartamento, mesora ela pidi pa presencia di polis y a avisa e doño di e compleho di apartamento.
Na momento cu polis a yega na e sitio, e mama y Sean bandona e sitio, nan a bay den auto di e mama. Pero un rato despues nan a regresa, Sean a baha for di auto y tabata keda mira den direccion di Kiran, dje ela cuminsa hisa man haciendo señanan provocativo, pero esaki no a dura mucho, paso mesora polis a detene Sean.
Keho oficial di intento di asesinato a wordo entrega y asina Sean R.L.M a keda deteni.
Na Aruba tin masha hopi hende cu problemanan mental, den cada bario tin e hendenan aki ta biba, pero nan ta keda bou tratamentonan special pa asina por ta calmo y asina evita cu nan por haci daño na otro. Dos aña pasa tabata tin e caso tristo na Boegoeroei caminda un oficial di polis a perde su bida durante un asistencia den cual un persona cu ta sufri di enfermedad mental tabata razo y a agredi e oficial di polis fatalmente. Mirando cu no tin un lugar pa interna tur e hendenan aki, mayoria bes ta opta pa laganan bay cas, pero nan ta keda bou tratamento y salubridad tin un team special cu ta pasa bishita e pashentnan pa asina percura cu nan ta haya nan medicamentonan pa nan keda calmo y por toch funciona den comunidad.