Den buki 1 titulo 2 di nos codigo civil tin diferente leynan tocante ‘namenrecht’. ‘Namenrecht’ ta e derecho cu ta regla e dunamento di un fam na un yiu. E articulo informativo aki lo limita su mes na e dunamento di fam na e mucha net despues di su nacemento. Adicional lo pone enfasis tambe riba e derecho cu un tata tin pa duna su yiu su fam den e caso cu e tata no ta den un enlace matrimonial cu e mama. Por ultimo lo pone enfasis riba e aspecto discriminatorio cu e ley actual tin.
Nos leynan actual ta duna preferencia na e tata. Pa e tata por duna su yiu su fam e lo mester tin un laso familiar huridico cu su yiu. Esaki ta nifica cu e lo mester reconoce su yiu prome cu e por dune su fam.
Articulo 1:5 inciso 1 BWA ta duna e regla principal. Segun e articulo aki e fam di e mucha ta bira esun di e tata (ora di reconoce), si esaki no ta e caso e mucha lo haya e fam di e mama. Esaki ta implica un yiu cu no wordo reconoci lo carga automaticamente e fam di e mama.
Si e tata cu e mama no ta casa y e mama no ta duna e tata e permiso pa reconoce su yiu, pasobra e no kier pa e mucha carga e fam di e tata, esaki toch por bira posibel a base di articulo 1:204 inciso 3 BWA. E articulo aki ta stipula e ‘vervangende toestemming’ cu e tata por hasi uso di dje. Esaki kiermen cu e permiso di e mama, cu ta necesario pa e tata reconose su yiu, lo por wordo reemplasa door di e permiso di un hues. Cu e condicion cu e mucha no a yega e edad di 16 aña ainda.
Remarcabel ta e hecho cu segun hurisprudencia e stipulacion cu e yiu lo carga fam di su tata despues di reconocimento ta uno discriminatorio. Door di esaki e mama no ta haya e opcion pa duna su yiu su fam y esaki lo ta sin suficiente hustificacion. E forma di discriminacion contra di e ser femenino aki lo ta empugna cu articulo I.1 di nos constitucion. Adicionalmente a pone enfasis cu e mesun articulo aki
(art. 1:5 inciso 1 BWA) lo ta conflictivo cu tres diferente tratado cual Aruba ta forma parti di dje ; Tratado Europeo di derechonan humano (EVRM), Tratado Internacional di derechonan civil y politico (IVBPR) y Tratado contra di discriminacion di hende muher. Corte Europeo den caso ‘Cusan & Fazzo’ a determina den pasado cu e ta discriminativo ora cu ley ta determina sin mas cu e yiu lo haya fam di e tata.
E liña cora den e topico aki ta cu e ‘namenrecht’ den codigo civil Arubano actual ta uno discriminatorio contra di e ser femenino. Articulo I.1 di e Staatsregeling di Aruba mes ta prohibi esaki. Mester enfatisa cu e ‘namenrecht’ den nos BWA ta den proceso pa wordo mehora y ta duna e mama tambe e oportunidad pa e yiu por carga su fam. Cu e articulo aki Tienda di Ley kier pa cada mama y tata ta informa tocante e dunamento di un fam na un yiu. Nos a elabora riba e derecho di e tata pa reconoce su yiu y pa duna su yiu su fam. Den un scenario cu e mama no ta desea di duna e permiso pa hasi esaki e tata por pidi pa un aprobacion di hues pa substitui e permiso di e mama. Tambe nos a elabora riba e derecho di e mama pa su yiu carga su fam aunke ley ta dicta otro.
Tienda di Ley ta spera di por a informa ciudadanonan na un forma satisfactorio. Den liñanan grandi nos a trese e topico aki pa dilanti. Si acaso bo tin pregunta of duda, semper bo por aserca un abogado of hurista pa mas splicacion den detayes. E ta posibel tambe pa acudi tur diasabra di 3 pm -5 pm na cas di partido AVP na playa . Pa nos colaboradornan y huristanan den formacion e ta un placer di por atende e publico cu ta asistiendo tur diasabra.
Autornan:
Jessica Burgos & Gerick Croes (studiantenan di ley)