ORANJESTAD – Dialuna Minister di Finanzas, Asunto Economico y Cultura a reuni cu sr. Jeroen Nijland kende ta director di Netherlands Foreign Investment Agency NFIA, e agencia cu ta busca inversionistanan pa Hulanda y ta guia inversionistanan Hulandes den exterior.
Tabata na februari 2018 cu e mandatario a reuni pa promer biaha cu sr. Nijland kende a sugeri pa Aruba haci uso di un facilitador pa asina hunto cu ‘stakeholders’ yega na un vision concreto pa diversificacion di economia di Aruba. E idea aki a concretisa na mei 2018 na unda cu e facilitador internacional sr. Colm Riley hunto cu ‘stakeholders’ a yega na e 6 sectornan prometedor pa diversificacion di Aruba su economia.
Durante e reunion den presencia di ehecutivonan di Departamento Economico, Minister Ruiz-Maduro a haci entrega di e documento cu ta contene e Maneho Economico Fuerte y Resiliente pa Pais Aruba. Sr. Nijland a keda impresiona pa e trabou cu Gobierno di Aruba a haci pa por a trece hunto den un documento tur informacion di e maneho cu ta wordo prepara y hiba riba e diferente terenonan cu ta forma e maneho economico pa Aruba. Entre nan, e maneho empresarial, maneho pa exportacion, y e maneho pa crecemento sostenibel teniendo na cuenta e 17 metanan di sostenibilidad di Nacionnan Uni. E documento ta contene tambe e 6 sectornan prometedor pa diverfisca nos economia, cual ta un resultado di e reunion fructifero hiba cu sr. Nijland di NFIA.
E mandatario a gradici sr. Nijland pa su bishita y colaboracion y ta spera di por keda conta cu e sosten di NFIA pa asina por sigi cu e trabounan pa inova Aruba su propio agencia di inversion.