Minister Rudy Lampe a menciona durante conferencia di prensa diahuebs 18 di juli, cu basa riba e iniciativanan cu tin pa pais Aruba, su ministerio a crea un plan di maneho financiero pa loke ta trata e presupuesto di enseñansa. Mirando cu e presupuesto aki ta esun di mas grandi di Aruba pa un suma total di mas di 280 miyon, Minister di enseñansa a tuma e iniciativa di crea un plan pa asina por tin un maneho mas estricto riba uzo di e placa aki.
E plan aki a wordo presenta na e diferente ministernan y aproba durante e reunion di Conseho di Minister. Segun Minister Lampe cu pa añanan largo no tawata tin responsabilisacion adecua pa un suma asina grandi. Tambe lo bay crea un departamento di financien nobo bou di e departamento di enseñansa y lo crea un inspeccion financiero na Inspectie Onderwijs pa asina aki bin un miho responsabilisacion di e placa di pueblo aki cu ta wordo hinca den eneñansa.
Tambe lo bay monitor e resultadonan, lo bay tin un maneho nobo di subsidio unda tur e directivanan di skol ta bay tin miho guia, miho contacto y mas profesionalismo. Manera ta conoci tur directiva di scol ta subsidia 100% pa Gobierno y pa e motibo aki tambe e “Good Governance Code” y “Accountability Rule” lo bay conta pa tur directiva y stichting cu ta ricibiendo placa di pueblo.
Cu e plan aki Aruba ta manda señal pa Hulanda cu Aruba mes ta tuma iniciativa pa crea un aparato gubernamental y un sistema di enseñnasa mas eficiente y no mester warda Hulanda yega cerca nos manera tawata e caso cu nos hermana isla Corsou.
Minister Lampe a expresa di ta hopi satifecho cu e plan aki y ta spera cu pronto por cuminsa ehecuta esaki pa tin un maneho financiero mas structura pa loke ta trata e presupuesto di enseñansa.