E siman aki e inversionistanan di e hotel pa San Nicolas a duna un presentacion na Conseho di Minister. E presentacion aki tawata uno hopi interesante na unda nan a divulga e plan, pintura y e potretnan cu nan tawata tin pa e hotel di San Nicolas. E plan pa cu e proyecto aki a resulta di ta uno hopi bunita pa nos comunidad pero muy en especial pa e area di San Nicolas. `
Prome Minister Evelyn Wever-Croes a expresa cu na comienso e tambe tawatin su preocupacion pa cu e construccion di e hotel aki mescos cu comunidad di Aruba pa motibo cu e hotel aki lo trece un aumento grandi den e total di cambernan cu lo bin acerca, sinembargo despues di a mira e presentacion y a scucha tur e plannan, su preocupacionnan tambe a kita.
Segun Premier Wever-Croes y Minister di Labor, Glenbert Croes e construccion di e hotel aki lo trece un desaroyo inmenso pa e area di San Nicolas, ofreciendo empleo na e comunidad di Aruba. Tambe nan a informa cu si tin algun necesidad di cierto servicionan special pa cu hotel aki, lo por ofrece diferente training na nos propio hendenan pa asina nan por ehecuta e trabounan necesario.
Otro topico cu tambe tin e comunidad di Aruba preocupa y en especial nos hobennan studia ta cu nan ta pensa cu trabouwnan na hotel no ta ser paga debidamente. Segun Premier Wever-Croes, e realidad ta cu den servicio di un hotel e oportunidadnan pa crece ta mas grandi y e salarionan ta interesante pero mas ainda e experiencia cu nos hobennan por gana trahando den un hotel ta uno hopi grandi.
Pa conclui Premier Evelyn Wever-Croes ta bisa: “E desaroyo cu e construccion di e hotel aki ta trece pa San Nicolas, e desaroyo cu e ta trece riba mercado di labor pero en especial e speransa cu e ta trece den nos economia ta motibo suficiente pa e comunidad di Aruba ta contento y satisfecho cu e gran proyecto aki pa San Nicolas.
