Riba peticion di e lidernan y docentenan di ‘Trai Merdia’ y ‘SPO’, y den deliberacion cu Conseho di Minister, Minister di Enseñansa sr. Rudy Lampe a tuma e decision pa nos continua cu algun di e cambionan proponi.
TRAI MERDIA
Mirando e importancia di Trai Merdia den e Crisis Plan Social di Gobierno, den deliberacion cu Minister di Enseñansa y Minister di Asuntonan Social, y mirando cu Trai Merdia no ta parti di ‘formeel onderwijs’, a keda dicidi cu Trai Merdia ta bay cay bou di Minister di Asuntonan Social. E ta keda awor ‘as is’ y hunto cu esnan encarga lo traha riba e cambionan necesario den futuro, pa asina por pone e mucha central y enfoca specialmente riba e retonan social.
SPO SANTA CRUZ NO TA MUDA PA PARIBA
Un grupo di maestro y mayornan preocupa siman pasa a entrega un manifesto cerca Prome Minister pa expresa nan preocupacion pa e plannan di muda SPO Santa Cruz hunto cu SPO Brazil. Despues di deliberacion cu Prome Minister, Minister di Enseñansa a tuma e decision di no ehecuta e plannan di mudamento di SPO Santa Cruz. Tambe a inspecciona e edificio nobo di SPO Brazil door di expertonan di gobierno hunto cu sindicato SIMAR y a tuma e decision cu e problemanan di e edificio di SPO Brazil lo wordo atendi cu n’e durante vakantie di scol.
E decisionnan aki lo trece trankilidad den enseñansa pa por cuminsa e aña escolar riba bon pia. Diabierna, Tanto lidernan y docentenan a keda hopi contento cu e decision aki di Gabinete Wever-Croes.
Prome Minister Evelyn Wever-Croes a gradici coleganan Minister pa nan flexibilidad y disponibilidad pa yega na un solucion, y tambe a gradici lidernan y maestronan pa nan preocupacion. Enseñansa ta e yabi pa futuro di nos muchanan. Gobierno, docentenan y mayornan mester traha hunto pa duna nos muchanan e fundeshi mas solido posibel. Gabinete Wever-Croes
tin e ser humano central y lo sigui pone e ser humano central.
