Home Local ORGANISA DOOR DI A.T.A -AHATA Y ARUBA AIRPORT AUTHORITY: ATCA 2019: MERCA...

ORGANISA DOOR DI A.T.A -AHATA Y ARUBA AIRPORT AUTHORITY: ATCA 2019: MERCA Y CANADA CU DESAROYO FUERTE Y PROMETEDOR

SHARE

Oranjestad – E siman aki, nos destinacion un biaha mas ta anfitrion di un conferencia turistico internacional, e biaha aki ta trata di e di 35 edicion di ATCA 2019 – Annual Tourism Conference Aruba.
Diamars anochi a yama un bonbini caluroso na tur participante durante un recepcion cual a wordo patrosina door di Renaissance Aruba Resort & Casino na Renaissance Private Island.

APERTURA OFICIAL
Diaranson mainta e apertura oficial a tuma luga na Renaissance Convention Center, unda Minister President Sra. Evelyna Wever-Croes a habri e conferencia, expresando su gratitud na tur e participantenan cu ta haciendo Aruba nan prioridad pa bende den exterior y asina atrae e bishitantenan pa disfruta di nos bunita destinacion. Minister di Turismo Sr. Danguillaume Oduber a elabora riba e importancia di e industria di Turismo pa Aruba, elaborando cu Aruba ta un isla hopi diversifica cu orientacion internacional, pero uno cu ta trata di mantene y accentua mas su cultura propio, loke nos bishitantenan ta encanta. Tambe a subraya e hecho cu e mercadonan Mericano y Canades ambos ta sumamente importante pa pais Aruba.

BIAHERONAN INTERNACIONAL Y SU NIFICACION PA ARUBA
Durante su presentacion, CEO di Aruba Tourism Authority Ronella Tjin Asjoe-Croes a ilustra entre otro riba turismo internacional. SKIFT cu ta un compania internacional bon conoci den e industria di viahe cu ta haci analisis di aerolinea –hotel – turismo en general – industria di crucero etc., den un raport recien ‘Global Travel Economics 2019–2029’ a menciona cu ‘biahe internacional ta un di e industrianan cu ta mustra desaroyo mas impresionante ultimo añanan, algo cu ta proyecta cu lo continua.’ Basa riba data historico di e Organisacion Mundial di Turismo (WTO) tawatin 494 miyon salidanan nobo di biaheronan internacional over di e ultimo 10 añanan. Segun pronosticonan di SKIFT, esaki lo bira 507 miyon salidanan di biaheronan nobo pa e siguiente 10 añanan!

Esaki kiermen cu e industria di viahe riba nivel internacional ta floreciendo. Tambe a remarca cu e manera cu turismo ta wordo crea, mercadea y consumi lo sigui transforma na un manera rapido.

E ROL DI ARUBA TOURISM AUTHORITY
Aruba Tourism Authority ta moviendo continuamente y den e ultimo 2 aña a finaliza algun proyecto importante di cual dos di nan ta: Capacidad di Carga (finalisando esaki) y e asina yama ‘Niche Road Map’. Ambos ta duna un guia transparente cu strategia y accionan cu e principionan di guia con pa miho anda cu e presencia y e futuro.

Aña pasa a finaliza e ‘Aruba Tourism Authority’s multi-annual corporate strategy’ pa e periodo di 2018-2021. Ademas a defini e aspiracionnan pa cu e siguiente añanan te cu 2025, hunto cu strategianan y particpacionnan necesario pa awe y e futuro.

E nucleo di Aruba Tourism Authority ta pa brinda prosperidad pa Aruba door di turismo sostenibel. Den esaki tin tres tema cu ta guia e aspiracion pa 2025: innovacion, sostenibilidad y liderazgo.

KICO ESAKI KIERMEN PA NOS DESTINACION?
Durante su presentacion, CEO di Aruba Tourism Authority a elabora riba e importancia di e tres puntonan menciona entre otro pa cu innovacion, mester pone enfasis riba loke e bishitante ta laga atras den nos ecomonia, esaki mester crece mas cu volumen di bishitante. Pa ta un destinacion innovativo cu ta engrandece nos atraccionnan pero cu alabez ta competitivo riba un nivel internacional (cu otro destinacionnan) ta esencial pa cu esaki.

Pa cu sostenibilidad mester controla nos crecemento na un manera cu ta contribui na e economia di nos comunidad pero tambe na nos ambiente social y nos ambiente en general. Aki mester tene cuenta cu e bishitantenan, nos comunidad y nos industria.

Ademas a elabora riba liderazgo unda a pone enfasis riba e fortaleza di e capacidadnan di Aruba Tourism Authority como un autoridad cu ta guia e industria di turismo y cu ta sirbi como un recurso importante pa tur esnan envolvi.

A subraya pa medio di presentacionnan con imperativo ta pa semper tuma e dinamismo di turismo na cuenta y sigui tendencianan global, cual CEO di A.T.A. a comparti.

A elabora hopi riba resultadonan tambe entre otro crecemento proyecta di bishitante afluente for di Merca na 2018 (+4%), highlights pa cu diversificacion dentro di Merca mes, y tambe con Aruba ta posiciona den e mercado Mericano. A resalta ademas cu aña pasa, Canada -cu un crecemento di 8%- a bira e di dos mercado mas grandi pa Aruba, surpasando Venezuela.

Aruba Tourism Authority ta gradici AHATA y Aruba Airport Authority y tur participante pa nan aporte continuo. E participacion na ATCA 2019 ta indica cu e interes den nos destinacion ta uno continuo, pero uno cu ta exigi trabou y dedicacion pa di es manera ey mantene e interes na nivel halto.