Home Local E prome “Active Shooter Awareness Seminar” teni na Aruba Organisa pa AAA,...

E prome “Active Shooter Awareness Seminar” teni na Aruba Organisa pa AAA, den cooperacion cu JetBlue Airlines y Cuerpo Policial Aruba

SHARE

ORANJESTAD – Aruba Airport Authority N.V. (AAA) den colaboracion cu JetBlue Airlines y Cuerpo Policial Aruba (CPA) recientemente a organisa e prome Active Shooter Awareness Seminar cu mas di 240 participante. E proposito di e 2 sesionnan tabata pa brinda concientisacion riba incidentenan cu un “Active Shooter” y pa ekipa participantenan cu tipnan y conseho kico pa haci pa sobrevivi un incidente asina.
Durante e sesion di mainta, cu a wordo atendi pa e cabesantenan di scolnan local, JetBlue Airlines a presenta nan “Safe Schools Program” y a enfoca riba e efectonan di un susedido di un Active Shooter na scol. Un sobreviviente di un tiroteo tragico na scol na Merca a comparti su storia y a elabora riba e fundacion cu el a cuminsa despues di su experiencia. CPA a comparti con nan ta prepara nan mes pa responde na incidentenan asina y a duna tambe tipnan valioso con scolnan por laga nan propio maestronan y alumnonan prepara plannan con pa salba bida di otro den un caso asina.
E sesion di atardi su enfoke tabata mas riba e comunidad di aeropuerto y a inclui un ehercicio “Table Top” guia door di JetBlue Airlines. Aunke cu a usa un scenario di aeropuerto, e lesnan cu a wordo sinja por wordo aplica den cualkier situacion di trabou/bida. CPA a comparti nan experiencianan di e drill recien cu a wordo teni na aeropuerto y a pone hopi enfasis riba e importancia di trainingnan di preparacion continuo. CPA tambe a comparti algun tip importante pa sa con pa reacciona y actua den un caso asina.

CEO di AAA Sr. James Fazio a indica cu Aeropuerto di Aruba ta un di e aeropuertonan di mas druk den e region di Caribe, cu 29 diferente aerolinea cu ta contribui na e procesamento di mas di 2.5 miyon pasahero pa anja y pa e motibo aki e ta aeropuerto su tarea pa proteha usuarionan di e infrastructura critico aki. Un incidente di Active Shooter hopi biaha ta pasa den algun seconde pero lo tuma varios minuut prome cu polis por yega na e sitio. Segun Fazio e ta crucial pa e comunidad di aeropuerto ta conciente y prepara pa incidentenan asina, aunke cu ta pensa cu esaki no lo pasa na Aruba. Fazio ta aplaudi e cooperacion entre e entidadnan cu recientemente a organisa e Active Shooter drill na aeropuerto mirando cu e tipo di trainingnan aki ta trese e concientisacion entre tur hende cu ta parti di e comunidad di aeropuerto.

“Safety ta nos balor principal, y nos ta consider’e importante pa colabora cu nos partnernan y miembronan di comunidad pa sinja prevencion y e comportacion adecua den scenario di peligro,” asina Sr. Jose Figueroa, JetBlue Director of Corporate Security for international markets a bisa. “Concientisacion y preparacion ta esencial pa sigura safety, y nos ta agradecido na Gobierno di Aruba, Cuerpo Policial Aruba, Aruba Airport Authority N.V., nos crewmembernan y partnernan pa yuda nos ofrese e “Safe Schools Program” na Aruba.”
CPA su Hefe di Polis Sr. Andrew Hoo a indica cu aunke CPA ta enfoca primordialmente riba duna presentacionnan di prevencion importante na diferente scol y otro entidad, esaki tabata e di 2 biaha cu CPA a conduci un drill asina y ta prome biaha cu CPA a participa den un seminario cu enfoke riba e forma di reacciona y intervencion. “E drillnan recien na aeropuerto y na e scol local a brinda nos Rapid Response team cu lesnan valioso,” segun Hoo.