ORANJESTAD, Aruba –Stichting Bloedbank Aruba a celebra dia internacional di donante di sanger cu tabata riba 14 di juni. E donantenan cu ta salba bida y pues ta ser considera como un heroe ta haci e bunita gesto di haci un donacion di sanger tur ora cu mester di nan of yama nan. Pa celebra e dia aki, Stichting Bloedbank a treat e donantenan como gradicimento.
Na Aruba tin solamente 1600 donante di sanger cu ta activo, asina Fabian Werleman, coordinador di Bloedbank, a duna di conoce. Segun e standard internacional e cantidad di donante mester ta 3000. E grupo di donante cu tin, ta dunando sanger riba un frecuencia basta halto y Bloedbank ta spera di por haya mas donante di sanger pa baha e presion riba e donantenan di sanger existente cu tin awor.
Loke a inspira Jelitza Lake pa bira un donante ta simplemente e hecho cu ta salba bida. Esey ta un motibo pakico bo ta bira un donante pa yuda otro. “E por ta ami mes cu un dia mester di sanger”. E parti di control ta super bon, pasobra bo ta haci un chekeo di salud di biaha, el a duna di conoce. E ta recorda cu un par di biaha e la bini Bloedbank y e no por a duna sanger pasobra su presion di sanger tabata halto y asina a ser manda su dokter di cas pa controla. “Bo mester ta optimal di salud, pues cu un sanger perfecto pa por duna na bo prohimo”, Jelitza Lake a duna di conoce.
Esunnan cu ta interesa pa bira donante di sanger por yama 587 0002 of pasa Bloedbank, pa asina haya mas informacion con por bira donante. Tambe por subi nos pagina di facebook of website www.bloedbankaruba.aw unda por registra pa un cita. Ora di cita lo haci un “intake” cu e persona, unda lo check presion di sanger, con halto e sanger ta. Tambe ta haci testnan di sanger pa mira riba enfermedadnan contagioso, ta haci un check up general di salud y despues e persona lo tende si e por bira un donante di sanger.
Un danki un bes mas ta bay na tur heroe cu ta duna sanger pa salba bida. Un docacion cu sin duda algun ta impagabel. Boso ta Aruba su heroenan!